Nanawagan ang House prosecution panel sa Senate Impeachment Court na pagtuunan ng pansin ang mga ebidensya at testimonyang ihaharap ni National Bureau of Investigation o NBI Director Melvin Matibag sa impeachment trial ni Vice President Sara Duterte.
Kaugnay ito ng imbestigasyon ng ahensya sa umano’y grave threats o Article 4 laban sa bise presidente.
Ayon kina House impeachment trial spokesperson Zia Alonto Adiong at House prosecution legal spokesperson Benjamin “Jay” Tolosa Jr., hindi dapat hayaang mailihis ang pagdinig sa mga usaping walang kaugnayan sa kaniyang testimonya.
Ang mahalagang dapat pagtuunan ng pansin ay ang mga ebidensiyang ihaharap ni Matibag kaugnay ng imbestigasyon ng NBI sa umano’y grave threats ng pangalawang pangulo.
Nilinaw ni Tolosa na si Matibag ang huling testigo ng prosekusyon para sa Article IV ng articles of impeachment, na tumatalakay sa umano’y pagbabanta laban kina Pangulong Ferdinand Marcos Jr., First Lady Liza Araneta-Marcos, at dating house speaker Martin Romualdez.
Iginiit naman ni Adiong na ang testimonya ni Matibag ay nakabatay lamang sa kanyang kaalaman bilang pinuno ng NBI at sa isinagawang imbestigasyon ng ahensya, kaya’t hindi aniya dapat ilihis ng mga isyung walang kaugnayan sa kaso.
Inamin din ni tolosa na maaaring kuwestiyunin ng depensa ang kredibilidad ni matibag sa cross-examination, ngunit aniya, ang tunay na dapat timbangin ng impeachment court ay ang mga ebidensiyang kanyang ihaharap.
Binigyang-diin pa ng prosekusyon na ang lahat ng usaping walang kinalaman sa imbestigasyon ay “ingay” lamang at hindi dapat makaapekto sa pagtalakay ng Article IV.
Tiwala naman si Adiong na kayang tukuyin ng impeachment court kung alin ang mga tanong na may kaugnayan at alin ang walang kaugnayan sa impeachment ni VP Sara. | mula sa panulat ni Geli mendez
