Sa pagsisimula ng oral arguments sa Senate Impeachment Court kaugnay ng impeachment trial ni Vice President Sara Duterte, binigyang diin ni House prosecutor at Akbayan Partylist Rep. Chel Diokno ang kahalagahan na mabuksan ang selyadong kahon ng Bureau of Internal Revenue o BIR upang malaman ang nilalaman ng tax at bank records ng bise presidente.
Sa pagtatanong ni Senator-Judge Joel Villanueva, kung paano tiniyak ng prosecution panel na ang hinihinging mga records ay hindi lang simpleng paghahanap ng ebidensya kundi palilinaw at pagpapatunay na may direktang kaugnayan sa mga alegasyon laban sa bise presidente.
Bilang tugon, nilinaw ni Diokno na ang hinihiling nila sa subpoena ay ang mga dokumentong may kaugnayan sa Article 2 hinggil sa unexplained wealth o hindi maipaliwanag na yaman ni VP Sara.
Aniya kung titignan ang hurisdiksyon pagdating sa unexplained wealth, klarong-klaro na sinabi mismo ng korte suprema na kailangang makita ang kabuuuang larawan at hindi lamang ang statement of assets, liabilities, and networth o SALN na isinumite ng isang lingkod bayan kundi ang kabuuan ng kaniyang kinita.
Paliwanag ni Diokno, ang SALN ay maihahalintulad sa snapshots na kada taong isinasagawa gayundin sa itr o income tax returns kumpara sa kabuuang record ng kita ng isang opisyal na hinihiling ng prosekusyon na maipasubpoena.
Sinabi ni Diokno na makikita lamang ang buong larawan, kapag nailabas na ang mga bank records ni VP Sara.
Dito kasi makikita ang “date-to-day” na lumabas at pumasok sa account ng isang respondent.
Iginiit ni Diokno na ayaw ng kanilang panig na matulad sa kaso ng DOF RIPS vs. Merencilla kung saan, sinabi ng Korte Suprema na hindi nagampanan ng Ombudsman ang kanilang trabaho.
Naniniwala si Diokno na ang subpoena ang tanging paraan para makuha ng hukuman ang mga kinakailangang datos, impormasyon, at mga dokumento. | mula sa panulat ni Geli mendez
