Magsasampa ang Office of the Ombudsman ng magkahiwalay na reklamo para sa preliminary investigation laban kina dating House Speaker Martin Romualdez, dating kongresista Elizaldy “Zaldy” Co, at iba pa kaugnay ng umano’y anomalya sa mga flood control project.
Ayon kay Assistant Ombudsman Mico Clavano, kabilang sa mga ihahaing reklamo ang plunder at paglabag sa Anti-Money Laundering Act.
Nilinaw ni Clavano na hindi pa ito pormal na kaso sa korte at bibigyan pa ng pagkakataon ang mga respondent na magsumite ng kanilang sagot bago magpasya ang panel of prosecutors kung isasampa ang kaso sa Sandiganbayan.
Batay sa imbestigasyon, si Romualdez umano ang pangunahing personalidad sa umano’y paglihis ng pondo. Kabilang sa ebidensya ang sinumpaang salaysay ng walong dating security personnel ni Zaldy Co at mga dokumentong nag-uugnay sa umano’y money trail.
Sa ngayon, nagpapatuloy pa ang imbestigasyon at posible pang may mga karagdagang kasong maisampa. | mula sa panulat ni Jenn Patrolla
