Nakapagtala ang Baguio City Police Office ng 731 vehicular accidents mula Enero hanggang Setyembre ng kasalukuyang taon.
Ayon kay LT. Col. Domingo Gambican, BCPO chief operations, mayroong average na 81 aksidente na nangyayari sa kalsada buwan-buwan sa Summer capital.
Bumaba naman ito noong nagkaroon ng pandemya bunsod ng mga implementasyon ng lockdowns ngunit aniya, nahirapang mag-adjust ang mga drivers sa karaniwang bumper-to-bumper na kondisyon ng kalsada na humahantong sa aksidente.
Sa 731 na bilang, 232 ang naganap noong first quarter, 273 noong second quarter, at 226 nitong third quarter.
Ayon kay Gambican, pangunahing sanhi ng mga aksidente ang human error at mechanical defects sa sasakyan kaya’t pinaalalahanan nito ang mga motorista na palaging suriin ang kanilang sasakyan para matiyak ang kanilang kaligtasan.
Ikinaalarma naman ni Baguio City Mayor Benjamin Magalong ang dami ng naitalang aksidente sa kanilang lugar at inatasan ang BCPO na paigtingin ang kanilang kampanya sa edukasyon sa kaligtasan sa kalsada sa pamamagitan ng Crime Information Reporting and Analysis System (CIRAS). —sa panulat ni Hannah Oledan