Nasa 6.4 milyong bakuna kontra COVID-19 mula sa iba’t-ibang manufacturers ang inaasahang darating bago matapos ang buwan ng Hunyo.
Ito’y ayon kay Vaccine Czar Secretary Carlito Galvez Jr., kung saan ang mga paparating na suplay ang siyang pupuno sa target deliveries ngayong buwan na 10,804,820 COVID-19 jabs.
Aniya, apat na milyong bakuna mula sa Sinovac ang matatanggap ng bansa ngayong buwan.
Aabot sa 250,000 COVID-19 vaccines mula naman sa Moderna ng Estados Unidos ang darating sa Hunyo 25 kung saan ang 50,000 dose ay para sa pribadong sektor.
Sa ikatlong linggo naman ng Hunyo, darating ang 2.028 million AstraZeneca vaccines na mula sa Covax facility.
At karagdagang 150,000 doses ng Sputnik V ang inaasahang darating din ngayong buwan.
Samantala, inaasahan namang darating sa Hulyo ang 11.67 milyong doses ng COVID-19 vaccine. — Sa panulat ni Hyacinth Ludivico.