Epektibo na sa unang araw ng 2021 ang bagong polisiya ng pamahalaan kung saan hanggang 5k mga healthcare workers lamang ang papayagang makapagtrabaho sa ibang bansa kada taon.
Ayon kay Presidential Spokesperson Harry Roque, masusing pinag-aralan nina Pangulong Rodrigo Duterte at Inter-Agency Task Force (IATF) on Emerging Infectious Disease ang naturang polisiya.
Ani Roque, pinairal sa naturang desisyon ng pamahalaan ang pagbalanse sa pagitan ng pangangailangan ng bansa ng mga nurse, nursing assistant at nursing aide.
Gayundin ang pagkunsidera sa pagkilalang natatanggap ng Pilipinas dahil sa ibinabahaging talento ng mga Pilipino at demand ng mga manggagawang Pinoy sa ibang bansa.
Sinabi ni Roque ang paglalagay ng cap o limitasyon sa bilang ng mga ipadadalang Pilipino health workers sa ibang bansa ay kasunod ng rekomendasyong tanggalin na ipinaiiral na pansamantalang deployment ban.
