Patay ang tatlo katao matapos na makipagbarilan sa mga pulis.
Nangyari ang insidente mag-aalas-7:00 ng umaga sa Purok Tres Barangay Cupang sa Antipolo City.
Ayon kay Senior Supt. Lou Evangelista, hepe ng Rizal PNP Provincial Office, magsisilbi sana ng search warrant para sa iligal na armas ang mga pulis sa bahay ng isa sa mga suspek subalit nanlaban ito at kanyang mga kasamahan.
Kinilala ang mga napatay na sina Darry Alvarado alyas Batik, Jay-Ar Despojo alyas Tisoy at isang nakilala lamang sa alyas na Vincent.
Nakuha sa mga napatay ang iba’t ibang uri ng armas at bala gayundin ang tatlong motorsiklo, isang SUV, ilang sachet ng hinihinalang shabu at mga drug paraphernalia.
Patuloy ang isinasagawang imbestigasyon ng mga operatiba ng SOCO o Scene of the Crime Operatives sa pinangyarihan ng engkuwentro.
(Ulat ni Jaymark Dagala)
