Isinusulong sa kamara ang panukalang dagdag-buwis sa mga produktong may trans-fat na kadalasang nakikita sa mga processed meat.
Sa proposed bill ni Masbate Representative Scott Davies Lanete, papatawan ng dagdag na limang pisong ang kada lata o pakete ng mga pagkaing may trans-fat tulad ng hotdogs, corned beef, meat loaf at iba pa.
Layon aniya ng naturang panukala na maiwasan ang dumaraming kaso ng stroke dulot ng mga tinatawag na trans-fat o isang uri ng taba na masama sa kalusugan.
Una nang isinulong sa Kamara na patawan ng mas mataas na buwis ang matatamis na inumin tulad ng softdrinks at juice gayundin ang maalat na pagkain tulad ng instant noodles at junk foods.
By Rianne Briones
Umarangkada na ang joint naval patrol ng Pilipinas, Malaysia at Indonesia sa mga border ng tatlong bansa bilang bahagi ng trilateral agreement kontra trans-national crime.
Dinaluhan nina Defense Secretary Delfin Lorenzana ang launching ng joint patrol sa Tarakan, Indonesia kasama si Malaysian Minister of Defense Hishammuddin Hussein at Indonesian Minister of Defense Ryamizard Ryacudu.
Ayon kay AFP o Armed Forces of the Philippines Spokesman, Brig. General Restituto Padilla, layunin ng kasunduan na mabantayan ang mga seaborder ng tatlong bansa laban sa mga posibleng pagpasok ng mga teroristang grupo at maiwasan ang mga insidente kidnapping.
Kabilang sa mga tututukan ng joint naval patrol ang Celebes Sea at Sulu Sea.
By Drew Nacino
Tukoy na ng mga awtoridad ang nasa likod ng pagpaslang kay dating Abra Vice Governor Ronaldo Somera sa Marikina City.
Ayon kay Eastern Police District Director, Chief Supt. Romulo Sapitula, kinilala na ng mga imbestigador ang miyembro ng gun for hire group na bumaril kay Somera subalit hindi pa nila ito maaaring isapubliko upang hindi maunsyami ang follow-up operations.
Kalalabas lamang ng 62-anyos na biktima sa San Roque Cockpit Arena nang pagbabarilin ng dalawang salarin, noong Hunyo 2 na ikinasugat naman ng kanyang mga kasamang sina Reynaldo de Luna at Wilfredo Apalisoc.
Pauwi na sana si Somera sa bahay nito sa Vista Verde Subdivision sa Cainta, Rizal nang maganap ang insidente.
Samantala, inihayag ng anak ni Somera na si Josefina Jaja Disono, na inendorso ang kanyang ama ni dating Senador Ferdinand “Bongbong” Marcos upang maging direktor ng National Tobacco Administration, bago paslangin.
By Drew Nacino
Hindi na muna gagawa ng anumang proyekto ang komedyanteng si Pokwang dahil sa kanyang pagbubuntis.
Aminado naman si Pokwang na hindi na siya bata dagdag pa ang history niya ng miscarriage kaya naman tututukan nya at kakaririn muna ang kanyang pagbubuntis.
Ngayon pa lamang ay mayroon nang napipisil na pangalan si Pokwang at kanyang partner na si Lee O’Brian para sa kanilang baby.
Kung magiging lalaki aniya ay mayroon itong William base sa tradisyon ng pamilya ng kanyang partner habang kung magiging babae ay posibleng ipangalan niya sa kanyang ina.
Inamin naman ni Pokwang na matagal na nilang napag-uusapan ang kasal ngunit hindi muna ito matututukan dahil ang kanilang baby ang siyang prayoridad sa ngayon.
By Rianne Briones
Isa ang patay sa pag-araro ng kotse sa police van sa kilalang Champs-Elysees sa Paris, France.
Armado ng matataas na kalibre ng baril at kargado ng mga pampasabog ang kotseng minamaneho ng suspek na Darren Osborne, 47-anyos.
Nagliyab ang sasakyan matapos ang insidente na agad ikinasawi ng suspek.
Itinuturing naman ng French Police na panibagong terror attack ang nasabing insidente.
By Drew Nacino
Umani ng suporta mula sa iba’t ibang grupo ng mga Senior Citizen’s ang inihaing panukalang batas ni Senador Bam Aquino.
Ito’y para sa paglikha ng National Commission for Senior Citizens na naglalayong matiyak na protektado ang karapatan ng mga nakatatanda at maibigay ang karampatang benepisyo para sa kanila.
Kahapon, nakipagpulong kay Senador Aquino ang mga grupo ng Senior Citizens para magpahayag ng kanilang suporta sa pagsasabatas ng Senate Bill 674 na inihain ng Senador.
Ayon kay Aquino, mahalagang magkaroon ng komisyon na tututok sa kapakanan ng mga nakatatanda sa lipunan at mapangalagaan ang kanilang karapatan gayundin ang kanilang kapakanan lalo na sa nalalabing oras ng kanilang buhay.
By: Jaymark Dagala / Cely Bueno
Binanatan ni Senate Committee on Public Order and Dangerous Drugs Chairman Panfilo Lacson ang Department of Justice dahil sa hindi nito pagtupad sa kanilang tungkulin.
ito ang reaksyon ni Lacson makaraang payagang makapagpiyansa ng korte ang grupo ni CIDG Region 8 Director Supt. Marvin Marcos at ang mga tauhan nito na sangkot sa pagpatay kay Albuera Mayor Rolando Espinosa sr.
Giit ni Lacson, nagkaisa ang mga Senador na miyembro ng kaniyang pinamumunuang komite na planado o premedidated ang ginawang pagpatay kay Espinosa gayundin sa kapwa preso nitong si Raul Yap kaya’t murder ang dapat maging kaso ng grupo ni Marcos at hindi homicide.
Hinangaan pa naman nila ang DOJ nuon dahil sa kanilang rekumendasyon na double murder ang isampang kaso laban sa grupo ni Marcos ngunit ito rin mismo ang humiling sa korte na ibaba sa homicide ang kaso laban sa mga akusado na siyang dahilan ng paglaya ng mga ito.
By: Jaymark Dagala / Cely Bueno
Ibinunyag ng Office of the Solicitor General ang 20 maliliit na grupo kabilang na ang apat na kunektado umano sa ISIS na nagtatangkang magtatag ng kanilang teritoryo sa Mindanao.
Sa isinumiteng memoranda ng OSG sa Korte Suprema, inisa-isa nito ang mga kaalyadong grupo ng Abu Sayaf, Bangsamoro Islamic Freedom Fighters, Ansarul Khilafah Philippines at Maute Group na kunektado sa international terror group.
Kabilang sa mga ito ang Ansar Dawiah Fi Filibbin; Rajah Solaiman Islamic Movement; Al Harakatul Islamiyah Battalion; Jama’at Ansar Khilafa; Ansharul Khilafah Philippines Battalion; Bangsamoro Justice Movement; Khilafah Islamiya Mindanao H. Abu Sayyaf Group (Sulu faction); Syuful Khilafa Fi Luzon; Ma’rakah Al-Ansar Battalion at Dawla Islamiyyah Cotabato.
Gayundin ang Dawlat Al Islamiyah Waliyatul Masrik; Ansar Al-Shariyah Battalion; Jamaah Al-Tawhid Wal Jihad Philippines; Abu Dujanah Battalion; Abu Khubayn Battalion; Jundallah Battalion; Abu Sadr Battalion;
Jamaah Al Muhajirin Wal Anshor at Balik-Islam Group.
Ang mga nasabing grupo umano ayon sa osg ang siyang pasimuno ng mga pag-atake sa iba pang bahagi ng Mindanao tulad ng Basilan, sulu, Tawi-Tawi, Zamboanga at Davao.
Ginawa ng OSG ang nasabing hakbang bilang pagtugon sa atas ng Supreme Court kaugnay ng ginawang oral arguments kontra sa idineklarang Martial Law ni Pangulong Rodrigo Duterte sa Mindanao.
By: Jaymark Dagala
Aminado ang sandatahang lakas ng Pilipinas na magiging malaking problema para sa mga sundalo na nakikipagbakbakan sa Marawi kung magpapasya ang Korte Suprema na iligal ang pagdideklara ng batas militar sa Mindanao.
Ito ang reaksyon ni AFP Spokesman Brig/Gen. Restituto Padilla sa pahayag ni Pangulong Rodrigo Duterte na ipu-pull out nito ang mga sundalo sakaling kontrahin ng high tribunal ang kaniyang idineklarang martial law sa nasabing rehiyon.
Giit ni Padilla, kinakailangan na nilang pumila sa Mga korte para humingi ng search warrant sa oras na bawiin ang martial law na siyang magiging dahilan para maantala ang kanilang operasyon.
Tiyak din aniyang lalakas ang puwersa ng mga kalaban dahil tali na ang kamay ng mga sundalo at kanila nang ipauubaya ang law enforcement sa pulisya at lokal na pamahalaan.
By : Jaymark Dagala