Kinumpirma ng MERALCO o Manila Electric Company ang dalawang sentimos (P0.02) kada kilowatt hour na dagdag-singil sa kuryente simula sa susunod na buwan.
Gayunman, sinabi ni MERALCO Spokesman Joe Zaldarriaga na mararamdaman pa rin ng mga konsyumer ng MERALCO ang pagbaba sa kabuuang electricity bill dahil sa may ikalawang bugso pa ang kanilang refund na nagkakahalaga ng pitumpu’t siyam na sentimos (P0.79) kada kilowatt hour.
Paliwanag ni Zaldarraiga, dalawampu’t siyam (29) na buwan na magkakaroon ng dalawang sentimos na dagdag singil simula sa susunod na buwan busnod ng pagkakautang ng MERALCO sa Philippine Electricity Market Corporation na nagkakahalaga ng 1.69 bilyong piso.
Bahagi aniya ito ng 2.9 billion pesos na singil mula sa lahat ng distribution utilities at electric cooperatives sa Luzon at Visayas na bumili ng kuryente sa spot market mula taong 2012 hanggang 2015.
By Jaymark Dagala
Naghahanap ng business partners ang pamunuan ng Light Rail Manila Corporation para mapataas ang kanlang kita at mapabuti ang kanilang operasyon.
Ayon kay LRMC President at CEO Rogelio Singson, makabubuti ito para sa mga pasahero dahil hindi na kailangan pang humirit ng dagdag pasahe para sa maintenance ng nasabing transport system.
Inaasahan din nila na sa pamamagitan ng partnership sa mga pribadong kumpaniya, magkakaroon ng tatlumpung porsyentong pagtaas sa kanilang kita na siyang babalikat sa mga gastusin nito.
Una nang nakipagsosyo sa LRMC ang kumpaniyang Coca-Cola Bottlers Incorporated na siyang naglalagay ng dekorasyon sa mga bagon ng tren tuwing may mahahalagang okasyon tulad ng pasko, bagong taon, Valentine’s day at iba pa.
By: Jaymark Dagala
Hinamon ng pambansang pulisya ang Lanao del Sur Chapter ng IBP o Integrated Bar of the philippines na maglabas ng ebidensya sa kanilang paratang.
Ito’y makaraang isiwalat ng grupo ang umano’y looting o pagnanakaw ng mga pulis at sundalo sa mga tahanang sinira ng bakbakan kontra sa maute terror group sa marawi city.
Ayon kay PNP Spokesman C/supt. Dionardo Carlos, dapat munang patunayan ng IBP ang kanilang akusasyon laban sa mga pulis at sundalo at nangangako silang hindi ito palalampasin.
Gayunman, sinabi ni Carlos na nakapagtataka aniyang sila lamang ang tinitingnan ng grupo at hindi man lamang pinupuna ang ginawang pag-okupa ng Maute sa mga bahay na ginawa nilang sniper house.
By: Jaymark Dagala
Isiniwalat ni Senador Antonio Trillanes ang pagkakaroon ng Philippine Death Squad sa ilalim ng pamumuno mismo ni Pangulong Rodrigo Duterte.
Ayon kay Trillanes, pinamumunuan umano ng isang Supt. Leonardo ang nasabing death squad at sinasabing malapit din umano kay Presidential Son at Davao City Vice Mayor Paolo Duterte.
Kasunod nito, ininguso rin ni Trillanes si Supt. Marvin Marcos na siyang nasa likod ng mga naitatalang EJK o extra-Judicial Killings sa bansa sa kasalukuyan.
Ito aniya ang dahilan kaya’t naki-alam ang Pangulo sa pagpapalabnaw sa homicide mula sa murder ang kaso laban kina Marcos at sa iba pang sangkot sa pagpatay kay dating Albuera Mayor Rolando Espinosa Sr.
By: Jaymark Dagala / Cely Bueno
Pinapurihan ni Senate Minority Leader Franklin Drilon si Pangulong Rodrigo Duterte makaraang pirmahan nito ang Executive Order Number 28.
Ito ang batas na nagre-regulate sa paggamit ng iba’t ibang uri ng paputok na siyang sanhi ng mga naitatalang injuries sa tuwing may okasyon tulad ng pasko, bagong taon, pista at iba pa.
Kasunod nito, sinabi ni Drilon na hindi dapat na makuntento lamang sa Executive Order ang publiko dahil maituturing itong hamon sa Kongreso para magpasa ng kaukulang batas hinggil dito.
Sa pamamagitan nito ani Drilon, mas mapapalakas ang adbokasiya ng DOH o Department of Health sa kanilang kampaniya kontra paputok upang tuluyan nang mabura ang talaan ng mga casualties sa tuwing nagpapalit ang taon.
By: Jaymark Dagala / Cely Bueno
Pumalag ang Liberal Party sa naging pahayag ni Pangulong Rodrigo Duterte na hindi naman talaga sila concern sa kaniyang kalusugan kundi nais lamang nitong matiyak na siya’t mamamatay.
Ayon kay LP President at Senador Francis Pangilinan, hindi lamang personal kung hindi isang pambansang usapin ang lagay ng kalusugan ng punong ehekutibo.
Malinaw aniya ang nakasaad sa saligang batas na dapat malaman ng publiko ang lagay ng kalusugan ng Pangulo lalo’t bahagi ito ng kaniyang trabaho kaya’t dapat itong sundin ng Malakaniyang.
Magugunitang kapwa nanawagan sina Pangilinan at ang nakakulong na si Senadora Leila de Lima sa palasyo na maglabas ng medical bulletin ng Pangulo bilang bahagi ng transparency sa pamahalaan.
By: Jaymark Dagala / Cely Bueno
Posibleng naiwasan sana ang malaking pinsala at malaking bilang ng mga nasawi sa Marawi City kung hindi nagdeklara ng batas militar si Pangulong Rodrigo Duterte.
Ito’y ayon kay Albay Rep. Edcel Lagman na kabilang sa Magnificent 7 at isa sa mga petitioner kontra sa deklarasyon ng Martial Law gayundin sa suspensyon ng Privilege of the Writ of Habeas Corpuz sa Mindanao.
Muling naindigan si Lagman na hindi sa pag-atake ng mga terorista nakuha ng Marawi ang napakalaking pinsala nito kundi sa ginawang air strikes ng pamahalaan.
Kasunod nito, tinawag ni Lagman na destroy and compensate ang polisiya ng Pangulo sa marawi na aniya’y sobra nang gasgas at palyado dahil sa walang naidudulot na ganda sa bansa.
By: Jaymark Dagala / Jill Resontoc
Mas makabubuting madisiplina ng mga opisyal ng hudikatura ang mga mahistrado ng special division ng Court of Appeals na nag-utos na palayain ang Ilocos 6.
Ito ang tugon ni House Speaker Pantaleon Alvarez makaraang umapela sa kaniya sina Supreme Court Chief Justice Maria Lourdes Sereno at Court of Appeals Presiding Justice Andres Reyes Jr.
Magugunitang lumiham sina Sereno at Reyes kay Alvarez para hilingin ang muling pagkunsidera sa inilabas na show cause order ng House Committee on Good Government and Accountability laban kina Special 4th Division ng C.A.
Ayon kay Alvarez, reckless at pawang abusado sa kanilang kapangyarihan sina Acting Presiding Justice Stephen Cruz at mga miyembro nitong sina Justices Erwin Sorongon at Nina Antonino-Valenzuela sa kanilang naging hakbang.
By: Jaymark Dagala / Jill Resontoc
Dingdagan ng DOJ o Department of Justice ang mga prosecutor o taga-usig na aalalay sa panel of prosecutors na na-atasang humawak sa inquest proceedings ng mga maaarestong suspek sa Marawi Siege.
Batay sa kautusan ni Justice Secretary Vitaliano Aguirre II, limang piskal ang itinalaga para maging standby prosecutors sa mga masasampahan ng kasong rebelyon.
Ito’y kinabibilangan nila Assistant City Prosecutors Alfonso Vicente Jr at Ansharey Lalia mula sa Cagayan de Oro City gayundin sina Assistant Prosecutors Lito Sanchez at Tadeo Polestico na mula naman sa Misamis Oriental.
Paliwanag ni Aguirre, hahawakan lamang ng mga nasabing piskal ang inquest proceedings sakaling hindi kayanin ng kasalukuyang panel of prosecutors ang paghawak sa kaso dahil sa dami ng mga respondent.
By: Jaymark Dagala / Bert Mozo