Aminado ang Australian boxer na si Jeff Horn na kabado siya pero determinadong manalo laban kay 8 division world champion at Senator Manny Pacquiao.
Sa ngayon ay nasa huling bahagi na ng training si Horn bago ang kanilang bakbakan ni Pacman sa Brisbane, Australia, sa Hulyo 2.
Si Pacquiao naman, isandaang (100) porsyento nang handa para sa sagupaan habang tinatapos ang pag-eensayo sa General Santos City.
Bukas nakatakdang lumipad patungong Australia ang team Pacquiao para sa huling bahagi ng kanyang training.
Nakataya sa laban ang WBO welterweight belt ng Pambansang Kamao.
By Drew Nacino
Isang sugar planter o magtutubo at driver ang patay sa pananambang ng New People’s Army o NPA sa bayan ng Calatrava, Negros Occidental.
Kinilala ang mga biktima na sina Norberto Lumayno, animnapu’t pitong (67) taon at driver na si Danilo Braga, apatnapu’t limang (45) taon, kapwa residente ng naturang lugar.
Batay sa imbestigasyon, lulan ang dalawa ng puting pickup truck patungong azucarera nang paulanan ng bala ng higit sa sampung (10) kalalakihan sa barangay Minapasuk.
Tatlong oras matapos ang insidente, nakasagupa ng militar ang mga rebelde sa barangay Bug-ang sa karatig bayan ng Toboso.
By Drew Nacino
Kinondena ng Pilipinas, Malaysia at Indonesia ang bantang dulot ng terorismo hindi lamang sa Marawi kundi sa buong mundo.
Ito ay inihayag kasunod isinagawang trilateral meeting ng tatlong bansa kung saan nagkasundo ang mga ito na maglarga ng plan of action kontra terorismo.
Ayon sa Malaysian Foreign Minister, mahalagang magkaroon ng makabagong paraan para makaagapay sa ginagawang pag-atake ng mga terorista.
Sinabi naman ng Indonesian Foreign Minister na handa silang suportahan ang Pilipinas sa pagsupil sa terorismo lalo’t wala naman aniyang bansa na immune dito.
Inihayag naman ni Foreign Affairs Secretary ALan Peter Cayetano na kabilang sa napagkasunduan ay ang pagkakaroon ng kooperasyon para supilin ang ugat ng extremism tulad ng kahirapan, droga, krimen at kawalan ng hustisya.
Magkakaroon aniya ng malalim na intelligence coordination ang tatlong bansa para pigilan ang terorismo.
Haharangin din ang pagkalap ng pondo ng mga terorista gayundin ang pagpapakalat nila ng propaganda sa internet.
By Rianne Briones
Suportado ni Presidential Communications Office o PCO Assistant Secretary Mocha Uson ang panukalang batas na nagsusulong na mapakulong ang nagpapakalat ng pekeng balita.
Ayon kay Uson, napapanahon na upang mapanagot sa batas ang nasa likod ng pagpapakalat ng mga balitang walang basehan.
Inihalimbawa pa ni Uson ang pagkalat ng balitang umabot sa 59 ang namatay sa mga evacuation center na tinutuluyan ng mga biktima sa Marawi siege ngunit batay sa DOH o Department of Health ay 19 katao lamang.
Bagaman pabor si Uson na maparusahan ang mga nagpapakalat ng fake news inihayag nitong kinakailangan ding masusing pag-aralan ang batas.
Sa inihaing Senate Bill Number 1492 o ang Anti – Fake News Act ni Senador Joel Villanueva, maaaring makulong ng hanggang limang (5) taon at pagmultahin ng mula isang daang libong piso (P100,000) hanggang limang (5) milyong piso ang sino mang mapatunayang nagpapakalat ng fake news.
Ayon kay Villanueva, saklaw ng panukalang batas ang lahat ng nag-publish at distribute ng maling balita sa diyaryo, telebisyon, online media o social media.
Iginiit din ng senador na napapanahon na ang paglikha ng batas laban sa fake news dahil nagagamit ito para manakot at bilang propaganda o manira ng isang tao, grupo at institusyon.
By Rianne Briones
Malaki ang posibilidad na patay na ang isa sa mga leader ng ISIS-Maute group na si Omarkhayam Maute.
Ayon kay AFP o Armed Forces of the Philippines Chief of Staff General Eduardo Año, maaaring nasawi sa bakbakan sa Marawi City si Omar pero ang kapatid nitong si Abdullah ay posibleng nasa lungsod pa kasama ang sinasabing ISIS leader ng Timog-Silangang Asya na si Isnilon Hapilon.
Gayunman, hindi matiyak ni Año kung kailan namatay si Omar at wala pa ring ebidensyang magpapatunay sa kinahinatnan ng isa sa mga leader ng teroristang grupo.
Bineberipika na rin kung kabilang din sa nasawi ang isa pang miyembro ng Maute at kapatid nina Abdullah at Omar na si Madie.
Samantala, inaabandona na ng mga miyembro ng ISIS-Maute ang kanilang mga armas at humahalo na sa mga sibilyang nagsisilikas palabas ng Marawi City.
Ayon kay Lt. Col. Jo-Ar Herrera, Spokesman ng Joint Task Force Marawi, unti-unti ng nagiging desperado ang mga terorista para lamang matakas ang mga tropa ng gobyernong papalapit sa tinatawag na stronghold ng grupo.
Ito, anya, ay matapos ang mga serye ng pagkakaaresto sa mga magulang ng Maute brothers.
Dagdag ni Herrera, bagaman kabisado na ng mga terorista ang terrain ng lungsod dahilan upang makatakas, tiniyak naman ng gobyerno na hindi na makaaalis ang mga ito ng Marawi.
By Drew Nacino
Nagkaroon ng pagsabog sa tapat mismo ng Presinto Tres ng Manila Police District o MPD sa Arellano Avenue sa Malate, Maynila.
Naganap ang nasabing pagsabog pasado alas-3:00 kaninang madaling araw.
Nakuhanan ng CCTV camera ang insidente kung saan nakita ang isang lalaki na nakamotorsiklo ang naghagis ng hindi pa mabatid na uri ng bomba at nagpaputok pa ng baril matapos ang pagsabog.
Napinsala sa naturang pagsabog ang isang SUV at isang motorsiklo.
Iniimbestigahan na ng mga awtoridad ang pangyayari.
By Rianne Briones | with report from Gilbert Perdez
Hindi mapigilan ni Marian Rivera na manggalaiti sa sobrang galit dahil sa mga bashers ng kanyang anak na zia.
Ayon kay Marian, kung bakit naman kasi pati ang kanyang isang taong gulang na anak ay pinipintasan pa ng ilang netizens.
Aniya, posible niyang palampasin anuman ang bininabatong mga pagpuna sa kanya at maging sa kanyang asawang si Dingdong Dantes ngunit sobrang sakit aniya kapag ang kanyang unica iha ang idadamay ng mga basher.
Umapela pa si Marian sa mga bashers ni Zia na palampasin na ang kanyang anak at huwag nang pintasan pa sa social media.
By Rianne Briones
Isang indikasyon ng pagkatalo ang pagpapasabog ng Islamic State sa pinakamatanda at pinakamakasaysayang Grand Al-nuri Mosque sa Mosul, Iraq.
Ito ang inihayag ni Iraqi Prime Minister Haider Al-Abadi makaraang durugin ng ISIS ang nabanggit na mosque habang papalapit ang Iraqi Forces sa posisyon ng mga terorista.
Ayon kay Al-Abadi, inaasahang sa lalong madaling panahon ay idedeklara na ang kalayaan ng Mosul sa kamay ng pinakabrutal na terrorist group sa kasaysayan.
Bagaman maituturing na tagumpay, marami naman ang nagalit lalo’t mahigit walundaan (800) taon na ang mosque na sumisimbolo sa makasaysayang lungsod.
Samantala, inihayag ng Russian Defense Ministry na “malaki ang posibilidad” na nasawi si ISIS leader Ibrahim Al-Samarrai alyas Abu Bakr Al-Baghdadi sa inilunsad na airstrike ng Russia sa Syria noong isang buwan.
Bagaman bineberpika hanggang ngayon, isang indikasyon na patay na si Baghdadi ang halos isang buwang kawalan ng tumatayong leader ng ISIS.
By Drew Nacino
