Magpapakalat ng mahigit sa isang daang (100) pulis sa bahagi ng Quiapo, ang MPD o Manila Police District.
Ayon kay MPD Director Senior Supt. Joel Coronel, ang karagdagang puwersa ay upang tiyaking walang magiging anumang uri ng pagsabog sa lugar, lalo na at magsisimula na ang Ramadan sa Mayo 26.
Mananatili aniya roon ang mga pulis na miyembro ng MPD at ang contingent mula sa regional public safety battalion hanggang matapos ang Ramadan.
By Katrina Valle | with report from Aya Yupangco (Patrol 5)
Lumarga na ang Brigada Eskwela sa iba’t ibang pampublikong paaralan sa bansa, at ito ay magtatagal ng isang linggo.
Sa monitoring ng DWIZ patrol sa Fort Bonifacio Elementary School sa West Rembo, Makati, bago sinimulan ang paglilinis at pagkukumpuni ng mga kagamitan sa paaralan ay nagkaroon muna ng parada sa loob ng paaralan ang mga estudyante at guro.
Mahigit isang daang (100) estudyante naman mula sa Araullo Highschool ang pinagmartsa paligid ng kanilang paaralan.
Layunin ng Brigada Eskwela na maihanda ang mga paaralan para sa pagsisimula ng Klase sa Hunyo 5.
By Katrina Valle | with report from Aya Yupangco and Jelbert Perdez
Umarangkada na ang limang (5) araw na pagpupulong ng mga hepe ng militar mula sa mga bansang miyembro ng ASEAN o Association of Southeast Asian Nations.
Ang pulong ay pinangunahan ni AFP o Armed Forces of the Philippines Chief of Staff General Eduardo Año.
Layon anya ng kanilang pulong na alamin ang kakayahan ng mga hukbo ng militar sa rehiyon para humarap sa mga emergency security measures.
Kabilang sa mga pinag-uusapan ang hinggil sa maritime security, humanitarian assistance and disaster response, counter terrorism, infectious disease management at peacekeeping.
By Len Aguirre
Halos syam na raang (900) bilyong dolyar ang ilalatag ng China para sa may siyam na raang (900) proyekto na maaaring pakinabangan ng animnapu’t limang (65) mga bansa.
Inilatag ito ni Chinese President Xi Jin Ping sa pagbubukas ng Silk Road Summit sa Beijing o ang Belt and Road Forum.
Nakahanay sa mga proyektong ito ang China-Europe Railway Express na mag-uugnay sa dalawampu’t pitong (27) syudad sa China at dalawampu’t walong (28) syudad sa Europa.
Kasama rin sa proyekto ang daungan sa pakistan patungo sa hilagang kanluran ng Xinjiang Province sa China.
Bukod dito, maglalagay rin ang China ng industrial parks sa Malaysia, Belarus at iba pang lugar.
Ang Summit ay dinaluhan ng mga lider ng iba’t ibang mga bansa kabilang si Russian President Vladimir Putin.
By Len Aguirre
Hinihintay pa rin ng grupong Bayan Muna ang katuparan ng mga ipinangako ng Pangulong Rodrigo Duterte noong panahon ng kampanya.
Sinabi ni Bayan Muna Representative Carlos Zarate na bagamat mayroon nang unti-unting natutupad sa mga ito, inaantabayanan pa rin aniya nila, ang pangako ng Pangulo hinggil sa pagkakaroon ng independent foreign policy.
Sa kabila nito, positibo pa rin aniya, ang kanilang grupong matutupad ng Pangulo ang kanyang mga ipinangako, lalo na at papasok pa lang ang kanyang administrasyon sa kanilang unang taon.
“Meron ding mga pangako ang Pangulong Duterte na hanggang ngayon ay gusto nating makita ang linaw nito.”
PAKINGGAN: Bahagi ng pahayag ni Congressman Carlos Zarate
‘National ID system’
Nanindigan si Bayan Muna Representative Carlos Zarate na hindi kailangan ng Pilipinas ang national ID system.
Ayon kay Zarate, maliban sa walang katiyakan na makatutulong ito sa pagsugpo sa terorismo, hindi din ang pagkakaroon ng ID system ang susi sa paghahatid ng serbisyo ng pamahalaan sa mga mamamayan nito.
PAKINGGAN: Bahagi ng pahayag ni Congressman Carlos Zarate
Lubha pa aniyang nakakabahala ang pagpayag ng pamahalaan na mahawakan ng isang dayuhang kumpanya ang mga personal na impormasyong hawak ng Philippine Statistics Authority o PSA, dahil sa posibleng banta sa seguridad ng bansa.
PAKINGGAN: Bahagi ng pahayag ni Congressman Carlos Zarate
By Katrina Valle | Ratsada Balita (Interview)
Inaasahang mas marami pang miyembro ng Abu Sayyaf Group ang susuko sa mga susunod na araw.
Ayon kay Brig. General Restituto Padilla, Spokesman ng Armed Forces of the Philippines, sukol na ang bandido at halos nangangalahati na lamang ang natitirang miyembro ng mga ito mula sa limandaan (500) noong Disyembre.
Sinabi ni Padilla na marami na silang natatanggap na surrender feelers mula sa Jolo, Basilan at Tawi-tawi.
Samantala, kumbinsido ang militar na hindi na banta sa kapayapaan ang dalawa pang Abu Sayyaf sa Bohol na patuloy pang tinutugis ng mga sundalo.
PAKINGGAN: Bahagi ng pahayag ni Brig. General Restituto Padilla
Majayjay encounter
Samantala, balik na sa normal ang sitwasyon sa Barangay Ibabang Banga sa Majayjay Laguna kung saan nagkaroon ng engkwentro ang militar at NPA o New People’s Army.
Ayon kay Brig. General Restituto Padilla, Spokesman ng AFP, tinangkang atakihin ng mga rebelde ang isang kumpanyang nagsasagawa ng proyekto ng pamahalaan matapos itong tumangging magbigay ng revolutionary tax na tatlumpu’t anim (36) na milyong piso.
Nagkaroon aniya ng engkuwentro kung saan bahagyang nasugatan ang isa (1) nilang sundalo at isang (1) CAFGU.
PAKINGGAN: Bahagi ng pahayag ni Brig. General Restituto Padilla
By Len Aguirre | Ratsada Balita (Interview)
Nagsimula na ang Balikatan Exercise 2017 sa bayan ng Casiguran sa lalawigan ng Aurora.
Sentro ng pagsasanay ang paghahatid ng tulong sa gitna ng karagatan sakaling mawasak ng malakas na bagyo ang mga kalsada.
Kalahok sa pagsasanay ang mga eksperto mula sa Amerika upang ituro ang istratehiya at taktika sakaling may tumamang category 5 na bagyo sa Pilipinas o bagyo na mas malakas pa sa Yolanda.
Alas-8:00 ng umaga, lumipad ang dalawang (2) helicopters ng Amerika upang tignan kung ligtas na ang maghatid ng tulong.
Sinundan ito ng mga bangka mula sa BRP Tarlac na may sakay mga doktor at sundalong may bitbit na mga pagkain at gamot.
By Len Aguirre | with report from Jonathan Andal (Patrol 31)
