June 2026

Bumagsak sa kamay ng Bureau of Immigration o BI ang apat (4) na wanted Korean nationals na nagtatago sa bansa.

Nakatakdang ideport sa Seoul South Korea ang apat na suspects upang humarap sa korte na naglabas ng kanilang warrant of arrest para sa kasong fraud at voice phishing.

Ayon sa Bureau of Immigration, maayos na naisagawa ang pag-aresto sa mga suspects na sina Ryu Sunggon, Park Kyeol, Kim Myung Ryun, at Song Jungrak sa kanilang tinitirhan sa Parañaque City.

Sa ngayon ay nakakulong na ang apat sa warden facility ng Bureau of Immigration sa Bicutan Taguig habang ina-antay ang pagpapadeport sa kanila.

By Len Aguirre

Hindi na puwedeng gumamit ng application based programs tulad ng waze sa sandaling ipatupad ang Anti-Distracted Driving Actsa May 18, 2017.

Batay sa implementing rules and regulations ng batas, hindi puwedeng gamitin ang mga GPS based geographical navigation application program pati na ang TNVS o Transport Network Vehicle Service na ginagamit ng uber at grab habang nagmamaneho.

Ayon kay Chairman Edgar Galvante ng Land Transportation Office o LTO, kailangang tumabi muna sa kalsada ang motorista kung kinakailangan nyang gumamit ng application based programs.

By Len Aguirre

Mas malawak pang konsultasyon ang kailangang gawin para sa panukalang gawing apat (4) na raw na lamang ang pasok ng mga manggagawa sa loob ng isang linggo.

Ayon kay Civil Service Commission Chairperson Alicia Bala, kailangan pang bumuo ng mga mekanismo para hindi maapektuhan ang serbisyo publiko lalo na sa mga empleyadong nasa front line services o yung araw-araw na nakaka-transaksyon ng mamamayan.

Mas matinding konsultasyon rin anya ang dapat gawin pagdating sa pribadong sektor dahil sa magkakaibang klase ng trabaho.

Sinabi ni Bala na hindi rin sapat ipagbawalang bahala ang posibleng epekto ng mas mahabang oras ng trabaho sa isang araw sa kalusugan ng mga manggagawa.

“May mga pros and con para sigurado na lahat ng anggulo ay ang batas o panukalang batas na ito ay talagang matugunan kasi mahirap kapag ito ay pumasa at mapirmahan ng ating Pangulo, doon magsimula na marami pala ang ayaw. Hindi lamang ang Civil Service Commission ang dapat mag-aral nito kundi bawat ahensya kasi hindi naman namin kaya ito, ang nakikita namin dito, makikipagtulongan, magtutulongan lahat ng ahensya at ano ba yung mekanismo”, ani Bala.

Ayon kay Bala, mayroon nang mga local government units ang nagpapatupad ng 4-day work week.

Pinapayagan anya ito ng komisyon subalit kailangang mayroong matinding dahilan para ipatupad ito.

Sinabi ni Bala na ang kanilang pagpayag ay nakabatay sa Executive Order o EO ni dating Pangulong Gloria Arroyo para sa 4-day work week noong 2008 bagamat limitado ito para sa nasabing taon.

Hindi anya nila ito puwedeng ipatupad ng malawakan dahil sa kakulangan ng batas.

“Merong issuance only for that year, pero ngayon there are local government units lalo na ‘pag summer na nanghingi ng permiso sa Civil Service. Inevaluate naman namin at naintindihan namin yung kanilang paghingi ng exemption, so, on highly meritorious situation or request, nagsimula na kasi may pinagmulan yung aral”, bahagi ng naging pahayag ni Civil Service Chairperson Alicia Bala sa panayam ng DWIZ.

By Len Aguirre | Ratsada Balita Program (Interview)

Tuloy pa rin ang pamamahagi ng Department of Health ng condom, kahit na hindi ito pinayagan ng Department of Education.

Sinabi ni Health sec. Paulyn Ubial, ang mga condom ay maaring hingin sa mga barangay health centers at libre naman itong ibibigay.

Mahalaga aniya ang pagkakaroon ng safe sex, para mabawasan ang panganib ng pagsasalin ng HIV o Human Immunodeficiency Virus.

Sinabi ni Ubial na maliban sa pakikipagtalik, maari rin maisalin ang HIV sa pamamagitan ng paggamit ng mga kuntiminadong karayom, at mayroon din aniyang ilang pagkakataon na naisasalin ito mula sa nanay patungo sa anak.

“Pero tumataas na rin ‘yung acceptance o paggamit ng condom. Ngunit nais pa rin ng pamahalaan na sana bumaba na ‘yung mataas na porsyento among the least population ‘yung mga men having sex with men, ‘yung mga people with multiple sexual partners, iyan ang pinagmumulan ng new infections, HIV AIDS”, pahayag ni Ubial sa DWIZ.

By Katrina Valle

Lusot na sa makapangyarihang Commission on Appointments si Senador Alan Peter Cayetano bilang kalihim ng Department of Foreign Affairs.

Naaprubahan ang nominasyon ni Cayetano bilang Foreign Affairs secretary sa loob lamang ng dalawang minuto na siyang pinakamaikling confirmation hearing sa kasaysayan.

Ito ay sa pamamagitan Commission on Appointments committee sa pangunguna ni Senador Panfilo Lacson.

Una rito, dumating din sa senado si Presidential Communications Office Assistant Secretary Mocha Uson para magbigay umano ng suporta sa kumpirmasyon.

By Ralph Obina