June 2026

Aabot sa 500 Ulama mula sa 55 bayan ang inaasahang dadalo sa kauna-unahang Religious Summit for Peace and Security na gaganapin sa Cotabato City, simula ngayong araw hanggang Biyernes.

Puspusan na rin ang pagbibigay seguridad ng mga otoridad sa pangunguna ng Joint Task Force Central Mindanao sa pagdarausan ng aktibidad.

Ayon kay Capt. Arvin Encinas ng Joint Task Force Central Mindanao,  nais nilang matiyak na maiiwasan ang anumang  terrorist attack lalo’t karaniwang target ang mga Ulama o Islamic Religious Leader.

Bago ang kauna-unahang religious summit for peace and security, unang isinagawa sa Cotabato City noong isang  linggo ang Ulama Summit na dinaluhan din ng religious leaders sa loob at labas ng Central Mindanao.

By: Drew Nacino

Pinagpapaliwanag ni House Speaker Pantaleon Alvarez ang DBP o Development Bank of the Philippines kaugnay ng loans na iginawad nito sa tatlong kompanya.

Sa isinagawang pagdinig ng House Committee on Banks, sinabi ni Alvarez na batay sa report ng Commission on Appointments, umabot sa P5.6 Billion ang ipinautang ng DBP sa tatlong kompanya noong 2015 kahit pa malinaw umano na may pagsalungat ito sa credit policies ng bangko.

Ang tanging nabanggit sa 2015 COA report na sinasabi ni Alvarez na pinautangan ng nasabing halaga ay sa energy at housing sector.

Lumalabas na hindi naideklara ang pangalan ng tatlong kompanya na nakinabang sa Bilyong Piso na pautang ng DBP.

Dahil dito, inatasan ni Alvarez ang DBP na isumite ang pangalan ng tatlong nabanggit kompanya upang matukoy kung sinu-sino ang dapat na kasuhan kaugnay dito.

By: Meann Tanbio

Naniniwala ang Philippine National Police na nakumbinsi nila ang European Union Human Rights Commission na walang state sponsored killing sa bansa sa ilalim ng war on drugs ng administrasyong Duterte.

Kasunod ito ng pakikipagpulong ng PNP sa United Nations at European Union sa Geneva, Switzerland at Brussels, Belgium.

Ayon kay Chief Supt. Dennis Siervo ng PNP Human Rights Affairs Office, ipinarating nila sa EU na hindi totoo ang mga lumalabas na report sa media na may 7,000 nang napatay kaugnay sa kampanya laban sa illegal na droga na sinasabing extra judicial killings

Iginiit ni Siervo na aabot sa 2,800 lamang ang mga napapatay sa mga anti drug police operation.

Ang iba aniyang numero ay nasa ilalim na ng homicide at murder cases.

By: Meann Tanbio / Jonathan Andal

Nakatakdang sumalang si Senador Alan Peter Cayetano ngayong araw sa makapangyarihang Commission on Appointments matapos siyang italaga ni Pangulong Rodrigo Duterte bilang DFA Secretary.

Sinabi nina Senate President Aquilino “koko” Pimentel, Senate Majority Floorleader Tito Sotto at CA Committee on Foreign Affairs Chairman Panfilo Lacson na otomatiko nang resign sa pagiging Senador si Cayetano kapag nakumpirma na ito sa CA.

Bagamat ito na ang posibeng huling araw ng pagdalo  ni Cayetano bilang Senador, pero wala pa siyang plano na mag-valedictory speech dahil hindi pa naman daw siya nakukumpirma.

Kaugnay dito, kumpiyansa si Senador Alan Peter Cayetano na hindi siya matutulad kay dating DFA Secretary Perfecto Yasay na na-reject sa Commission on Appointments dahil sa isyu ng pagiging American Citizen.

Iginiit ni Cayetano na siya ay 101 percent  Filipino Citizen.

Mamayang alas-9:00ng umaga naka-iskedyul ang kumpirmasyon ni Cayetano sa Committee on Foreign Affairs ng CA na susundan ng official confirmation nito sa plenary session ng CA.

By: Meann Tanbio / Cely Bueno

Na-wow mali si Justice Secretary Vitaliano Aguirre makaraang maniwala ito na mayroong iregularidad sa pananatili ng isang Senior Citizen sa piitan ng MPDH, kahit pa ipinawalang-sala umano ito ng Manila Prosecutors Office  sa kasong paglabag sa Comprehensive Dangerous Drug Act of 2002 .

Nakasaad sa isinumiteng report ni Manila City Chief Prosecutor Edward togonon kay Aguirre na mayroong dalawang kasong isinampa sa Korte ang Manila Prosecutor laban sa namatay na bilanggong si Api Ang, 61 anyos.

Lumalabas sa resolusyon ng City Prosecution Office ng Manila noong January 30, 2017, si Ang ay inirekomendang masampahan ng kasong paglabag sa section 11 o possession of Dangerous Drugs ng Republic Act 9165 at paglabag sa Republic Act 10591 o Comprehensive Law on Firearms and Ammunition.

Katunayan nito, naihain na ang dalawang kaso laban kay Ang sa Manila Regional Trial Court nuong February 9, 2017 kaya lumalabas na may ligal na batayan ang pananatili niya sa bilangguan.

Una nang napaulat na namatay ang bilanggong si Ang na nakapiit sa MPDH sa kabila ng pagkakabasura ng isinampang kaso laban dito sa Manila Prosecutors Office.

Matatandaang iniutos ni Aguirre sa NBI na imbestigahan ang diumano’y iregularidad kaugnay sa pagkabilanggo ni Ang na inabot ng kamatayan sa kulungan matapos magsumbong ang pamilya ng biktima.

By: Meann Tanbio / Bert Mozo