June 2026

Inakusahan ng mga residente at alkalde ng Brooke’s Point sa Palawan ang isang minahan na illegal ang ginawang pamumutol ng mga puno sa naturang lugar.

Sa isang press conference na pinangunahan ni dating DENR Secretary Gina Lopez, iniharap sa media si Brooke”s Point Mayor Jean Feliciano at ibinunyag ang walang humpay na pamumutol ng mga puno ang isang kumpanya ng minahan na nais magmina ng nickel sa kanilang lugar.

Ayon kay Mayor Feliciano, mahigit sa 100 ektarya ang pinagpuputol na mga puno na matatagal ng nakatayo sa kabundukang bahagi ng Brooks Point.

Nabatid na mahigit sa 25 chainsaw na hindi rehistrado ang gamit sa pamumutol ng mga puno, habang nakaantabay umano ang mga armadong guardya.

Iginiit ni Mayor Feliciano na ang kumpanyang Ipilan Nickel Corporation, ang isa pang kumpanya na pag-aari ng GFNI o Global Ferronickel Holdings Inc. ay walang hawak na permit mula sa alkalde, at kanselado ang kanilang hawak na Environmental Compliance Certificate at magmamawakas na rin ang hawak nilang  mineral production sharing agreement.

Bilang reaksyon, nanindigan naman ang GFNI na may hawak silang special tree cutting  at earth-balling permit na inisyu ng DENR para sa kanilang operasyon sa lalawigan ng Palawan.

By: Meann Tanbio

Inaprubahan ng National Food Authority council  ang pag-aangkat ng bigas sa ibang bansa.

Batay sa napagkasunduan sa ginanap na pulong ng NFA council kamakalawa, isasagawa ang pag-aangkat sa pamamagitan ng government-to-private scheme para  magkaroon ng nakaimbak na bigas ang ahensya  sa pagsapit ng lean months o panahon na kakaunti lamang ang ani mula sa buwan ng Hulyo hanggang Setyembre.

Ipinaliwanag ng NFA council na sa ilalim ng bagong sistema, hindi lamang gobyerno ng ibang bansa ang maaaring lumahok sa public bidding kundi maging ang mga pribadong kumpanya na mula sa mga bansang makikilahok sa bidding at ito ay sakop pa rin ng Government Procurement Reform Act.

Gayunman, hihintayin pa ng konseho ang rekomendasyon ng National Food Security  Committee

Kung gaano karami ang aangkating bigas, batay sa natitirang standy by authority ng NFA na 250,000  metriko tonelada.

Inaasahang mababatid ang dami ng aangkating bigas sa isasagawang pagpupulong sa Mayo 18.

By: Meann Tanbio

Naging matagumpay ang pagsisimula ng Brigada Eskwela sa mga pampublikong paaralan sa Maynila.

Ayon kay Manila Division School Superintedent at Local School Board Deputy Chairman Director Wilfredo Cabral, maraming nakilahok at tumulong sa paglilinis at pagsasa-ayos ng mga paaralan.

Naglaan din aniya ang lokal na pamahalaan ng isang (1) bilyong pisong pondo para sa pagtatayo ng mga bagong gusali ng mga paaralan, subalit nagkaka problema lang aniya, dahil sa kawalan ng lupang pagtatayuan.

Inaasahang aabot sa dalawang daang libong (200,000) estudyante ang papasok sa mga pampublikong paaralan sa lungsod, pagdating ng Hunyo 5.

By Katrina Valle | With Report from Aya Yupangco

Nananatili pa sa Office of the Legal Counsel ng senado, ang ethics complaint na isinampa ng grupo ng mga kababaihan laban kay Senador Tito Sotto, dahil sa hindi nito magandang biro kaugnay sa pagiging solo parent ni DSWD Secretary Judy Taguiwalo.

Ayon kay Ethics Committee Vice Chairman Ping Lacson, nais niya kasing malaman kung ang ethics committee ang dapat humawak sa reklamo, gayung nangyari ang kontrobersya sa pagdinig ng CA o Commission on Appointments.

Bagamat mga senador at kongresista ang miyembro ng CA, hiwalay na constitutional entity aniya ito na mayroong sariling disciplinary mechanism, bagamat hindi pa nabubuo.

Dahil hindi pa tukoy kung ethics committee ang may hurisdiksyon sa reklamo, hindi pa aniya kailangang mag leave bilang chairman nito si Sotto.

By Katrina Valle | With Report from Cely Bueno