Monthly Archives

June 2026

NATIONAL NEWS

Pag-aangkat ng 7M kilo ng baboy aprubado na ng DA

written by DWIZ 882

Aprubado na ng DA o Department of Agriculture ang pag-aangkat ng pitong (7) milyong kilo ng baboy.

Inaprubahan ng DA ang pag-iimport ng baboy matapos ihayag ng Bureau of Animal Industry na may kakulangan sa suplay nito.

Magmumula ang imported meat mula sa Canada, Denmark at Germany, at inaasahang maidadala ito sa Denmark sa loob ng 30 hanggang 35 araw.

Bago ito, sinabi ng Bureau of Animal Industry na sa Hulyo pa ang inaasahang pag-harvest ng mga inaalagang baboy.

By Meann Tanbio

May 17, 2017 0 comment

SPORTS

Ikalawang panalo sa NBA Western Conference Finals naibulsa ng Golden State

written by DWIZ 882

Naibulsa ng Golden State Warriors ang ikalawa nilang panalo sa NBA Western Conference Finals kontra San Antonio Spurs.

Walang nagawa ang Spurs at inilampaso ng Warriors sa iskor na 100-136.

Nanguna sa panalo ng Golden State ang kanilang main man na si Stephen Curry na kumana ng dalawamput siyam (29) na puntos.

Sobrang dismayado naman si Spurs Coach Greg Popovich sa naging performance ng San Antonio.

Aminado si Popovich na hindi niya inasahan na ganoon ang kasasapitan ng kanyang koponan.

Plano namang bumangon ng Spurs sa Game 3 gamit ang home court advantage.

By Ralph Obina

May 17, 2017 0 comment

INTERNATIONAL NEWS

Komunikasyon sa North Korea nais buksan ng South Korea

written by DWIZ 882

Nais buksan ng South Korea ang komunikasyon nito sa North Korea.

Ito ay batay sa two track policy na nais ipatupad ng bagong Pangulo ng Korea na si Moon Jae-In.

Sa naturang polisiya, tututukan ng Sokor ang sanctions at dialogue sa pagitan ng kanilang bansa at karibal nitong Pyongyang.

Gayunman, pinag-aaralan pa ng Unification Ministry ng Sokor ang nais mangyari ng kanilang bagong Pangulo.

Matatandaang nitong linggo lamang nang huling magpakawala ng pinakabago nilang missile ang Pyongyang.

By Ralph Obina

May 17, 2017 0 comment

HEADLINES

2 araw na transport strike naka-amba sa susunod na linggo

written by DWIZ 882

Naka-amba sa susunod na linggo ang dalawang (2) araw na transport strike ng mga jeepney.

Ayon kay National Confederation of Transport Workers Union Chairman Ernie Cruz, ito ay bilang protesta ng mga tsuper at jeepney operator sa planong pag-phase out sa mga luma nang jeepney.

Binigyang diin ni Cruz na hindi natinag ang pamahalaan sa kanilang tigil pasada noong Pebrero kaya’t nais nilang paralisahing muli ang transportasyon ngayong buwan.

Ilalarga ng grupo ang tigil pasada sa Mayo 22 hanggang 23.

By Ralph Obina

May 17, 2017 0 comment

RONDA PROBINSYA

17 katao sugatan sa banggaan ng bus at AUV sa Calauag, Quezon

written by DWIZ 882

Sugatan ang labing pito (17) katao sa banggaan ng bus at AUV sa Calauag, Quezon.

Ayon sa ulat, napipi nang husto ang AUV na Toyota Avanza habang nahulog naman sa sampung (10) talampakang bangin ang bus.

Agad namang dinala sa mga ospital sa Calauag at Lopez ang mga biktima upang lapatan ng lunas.

Iniimbestigahan pa ng mga otoridad ang sanhi ng naturang aksidente.

By Ralph Obina

May 17, 2017 0 comment

NATIONAL NEWS

Mobile clinics patuloy na ipinapadala ng Fortune Life Insurance Company

written by DWIZ 882

Patuloy ang pagpapadala ng Fortune Life Insurance Company ng mga mobile clinics sa mga paaralan sa iba’t ibang lugar sa bansa.

Layon nito na mapangalagaan ang kalusugan ng mga guro bilang pagkilala sa pagkalingang ibinibigay nila sa mga kabataan.

Ang health services ay benepisyong ipinagkakaloob sa mga guro na miyembro Fortune Medicare Inc o Fortune Care at Insurance Policyholder ng Fortune Life.

Ngayong taon lamang, umaabot na sa isang libo pitong daang (1,700) guro ang napagsilbihan na ng mobile clinics.

By Len Aguirre

May 17, 2017 0 comment

INTERNATIONAL NEWS

China naglagay ng rocket launchers sa ina-angkin nilang bahagi ng South China Sea

written by DWIZ 882

Naglagay ng rocket launchers ang China sa ina-angkin nilang bahagi ng South China Sea na ina-angkin rin ng Vietnam, Taiwan at Pilipinas.

Ang lugar sa Spratlys ay tinagurian ng China na Fiery Cross Reef at Kagitingan Reef naman para sa Pilipinas.

Ayon sa report ng isang pahayagan sa China, ang rocket launcher na inilagay sa Kagitingan Reef ay mayroong kakayahang diskubrehin, kilalanin at atakihin ang mga combat divers.

Target di umano nito ang mga Vietnamese combat divers na noong 2014 pa ay naglagay na ng mga fishing nets sa mga islang ina-angkin nila sa Spratly Islands.

By Len Aguirre

May 17, 2017 0 comment

NATIONAL NEWS

Visa free entry policy para sa mga Pinoy ipinagpaliban ng Taiwanese gov’t

written by DWIZ 882

Ipinagpaliban ng Taiwanese government ang implementasyon ng kanilang visa free entry policy para sa mga Pilipino.

Ayon sa Taipei Economic and Cultural Office sa Pilipinas, nais ng kanilang Ministry of Foreign Affairs na makumpleto muna ang mga mahahalagang prosesong administratibo at inter-agency coordination.

Posibleng sa Setyembre di umano magkaroon ng announcement sa eksaktong petsa kung kelan ito ipatutupad .

Ang visa free policy para sa mga Pinoy ay unang inihayag na ipatutupad na sana ngayong Hunyo.

By Len Aguirre

May 17, 2017 0 comment

HEADLINES

26 na preso patay dahil sa siksikan sa mga kulungan sa Metro Manila

written by DWIZ 882

Umabot na sa dalawamput anim (26) na bilanggo ang nasawi dahil sa siksikang mga kulungan sa Metro Manila mula lamang noong Hunyo ng nakaraang taon.

Ayon kay Chief Superintendent Oscar Albayalde, hepe ng Philippine National Police – National Capital Region Police Office (PNP-NCRPO), labing walo (18) sa mga nasawing bilanggo ay mula sa kulungan ng Taguig Police Station.

Sinabi ni Albayalde na umaabot sa dalawandaan (200) ang nakakulong sa bilangguan ng Taguig Police Station samantalang hanggang animnaput dalawa (62) lamang ang kapasidad nito.

Dahil dito, minabuti anya nilang ilipat muna ang maraming bilanggo sa pansamantalang kulungan sa Camp Bicutan hanggat hindi pa nagde-desisyon ang Korte kung saan sila permanenteng makukulong.

Kaugnay nito, nanawagan sa kinauukulan si Albayalde na gawan ng paraan ang mala sardinas na kondisyon ng mga kulungan sa mga himpilan ng pulisya.

By Len Aguirre

May 17, 2017 0 comment

HEADLINES

Recall petition inihain vs San Juan City Mayor Guia Gomez

written by DWIZ 882

Naghain ng recall petition laban kay San Juan City Mayor Guia Gomez ang mga supporters ni dating san Juan Vice Mayor Francis Zamora.

Kung maaprubahan, magkakaroon muli ng eleksyon sa San Juan City para pumili ng alkalde kung saan puwede ring tumakbo uli si Gomez.

Isinumite ng grupo ni Sophia Gil, natalong konsehal sa San Juan ang lagda ng tatlumpung libong (30,000) botante ng San Juan na di umano’y dismayado na sa pamamahala ni Gomez.

Ayon kay Gil, nag-ugat ang recall petition sa di umano’y katiwalian, pang-aabuso sa kapangyarihan at kapabayaan ni Gomez bilang Mayor ng San Juan.

Sa ilalim ng Local Government Code, maaring mag petisyon para sa recall election ang dalawamput limang porsyento (25%) ng bilang ng mga botante sa isang syudad o munisipalidad.

Maaaring isagawa ang recall election matapos ang isang taon mula nang maupo ang nahalal na alkalde at isang taon bago ang susunod na eleksyon o sa pagkakataong ito ay mula June 30, 2017 hanggang May 11, 2018.

Nitong nakaraang eleksyon ay umabot sa mahigit pitumput isang libo (71,000) ang rehistradong botante ng San Juan.

Nangangahulugan na mahigit dalawamput isang libong (21,000) verified signatures lamang ang kailangan ng COMELEC o Commission on Elections para ipatupad ang recall elections.

Dating San Juan Vice Mayor Francis Zamora dumistansya sa recall petition vs Gomez

Dumistansya si dating San Juan Vice Mayor Francis Zamora sa recall petition laban kay San Mayor Guia Gomez.

Ayon kay Zamora, hindi na ito isyu ngayon ng hidwaan sa pagitan ng pamilya Zamora at pamilya Estrada dahil taumbayan na ang humihiling na mapalitan sa puwesto si Gomez.

Dating magka-alyado ang mga Zamora at Estrada-Ejercito ng San Juan subalit nitong nagdaang eleksyon, lumaban si dating Vice Mayor Francis Zamora kay Gomez subalit hindi nagwagi.

Nakuha naman ni Congressman Ronaldo Zamora ang puwesto sa kongreso kontra kay dating Councillor Jana Ejercito samantalang nanalong Vice Mayor si Janella Ejercito.

By Len Aguirre

May 17, 2017 0 comment

Newer Posts

Older Posts