Umakyat na sa 21 ang bilang ng mga nasawi sa landslide sa East China.
Naganap ang pagguho ng lupa sa Lidong Village sa probinsya ng Zhejiang.
Bukod sa mga nasawi, umaabot din sa halos 30 bahay ang natabunan ng rumagasang putik at bato sa naturang village.
Pahirapan din ang pag-rescue sa mga apektadong residente dahil lumikha ng malawak na barrier sa lugar ang rumagasang putik at bato.
By Jelbert Perdez
Handa na ang mga senador na miyembro ng Senate Electoral Tribunal o SET na bumoto sa disqualification case na iniharap ni Rizalito David laban kay Senator Grace Poe dahil sa isyu ng citizenship.
Kabilang sa mga nagpahayag ng kahandaan ay ang mga senador na sina Loren Legarda, Tito Sotto III, Bam Aquino, Nancy Binay, Cynthia Villar, at Pia Cayetano.
Giit ng mga naturang senador, napag-aralan na nila ang kaso kaya’t handa na silang ibigay ang kanilang boto.
Bagama’t walang pasok sa Korte Suprema bunsod ng APEC Summit, tuloy ang botohan dahil paalis ang Chairman nito na si Senior Associate Justice Antonio Carpio at iniba na lamang ang venue na pagdarausan ng botohan.
By Jelbert Perdez | Cely Bueno (Patrol 19)
Handang-handa na ang Malacañang sa pagtanggap sa presidente ng Chile na si Michelle Bachelet.
Ang Chilean President ay nakatakdang makipagkita kay Pangulong Noynoy Aquino para sa kanyang dalawang araw na state visit sa Pilipinas.
Gaya ng ibang head of state, si Bachelet ay bibigyan ng welcome ceremony sa Malacañang Palace Ground.
Tampok sa pagbisita ng Chilean President sa Malacañang ngayong tanghali ay ang expanded bilateral meeting nila ni Pangulong Noynoy, paglagda ng mga kasunduan, at ang joint press conference ng dalawang lider.
Habang nasa Malacañang si Bachelet ay mahigpit ang ipinaiiral na seguridad at walang papayagan na mga sasakyan pribado man o pampubliko na dumaan sa kahabaan ng J.P. Street at maging sa Arlegui Street na sakop ng Malacañang Complex.
By Jelbert Perdez | Aileen Taliping (Patrol 23)
Tiniyak ng mga bangko ang sapat na cash sa mga ATM o Automated Teller Machines ngayong APEC week na deklaradong holiday.
Ayon kay Cesar Virtusio, Managing Director ng BAP o Bankers Association of the Philippines, sinisiguro ng mga bangkong miyembro nila ang available cash sa buong isang linggo.
Sinabi pa ni Virtusio na nagkasa na rin ng mekanismo ang mga bangko para sa security concerns.
Hinihimok pa rin ni Virtusio ang publiko na i-check sa kani-kanilang mga bangko kung anong brach ang bukas gayundin ang financial services na available ngayong APEC week.
Ipinabatid ng BAP na bukas ang ilang branch ng ilang commercial banks sa Metro Manila sa November 17 at 20 samantalang ilang bangko din ang mananatiling bukas sa November 18 at 19.
By Judith Larino
Umapela ang Department of Interior and Local Government (DILG) sa publiko na iwasan ang mga venue na may kinalaman sa APEC Summit gayundin ang mga lansangan patungo at mula sa mga lugar na ito.
Sa gitna na rin ito nang pagpapalakas ng seguridad para sa mga dadalong heads of state.
Sinabi ni DILG Secretary Mel Senen Sarmiento na dinagdagan pa ang security forces na itinalaga sa Metro Manila para na rin sa kaligtasan ng mga delegado.
Asahan na rin aniya ang mabigat na daloy ng trapiko sa mga lugar kung saan gagawin ang mga aktibidad kaugnay sa APEC.
By Judith Larino
Kasado na ang public hearing ng Commission on Elections (COMELEC) kaugnay sa isinusulong nitong gawin din sa mga mall ang pagboto para sa 2016 presidential elections.
Ayon kay Commission on Elections COMELEC Chairman Andres Bautista, iimbitahan nila sa nasabing pagdinig ang mga political party gayundin ang publiko para marinig ang kanilang pananaw hinggil dito.
Sinabi ni Bautista na isasagawa nila ang public hearing bago matapos ang buwang ito.
By Judith Larino
Maagang nagsuspindi ng klase ang ilang mga paaralan sa Metro Manila.
Bukas pa, November 17 ang simula ng class suspension para sa APEC Summit subalit minabuti ng ilang paaralan na simulan na ngayong Lunes ang suspension of classes.
Kabilang sa mga buong linggo nang suspendido ang pasok ay ang De La Salle University, National University, Lyceum, Adamson, Philippine Women University, Philippine Normal University, College of St. Benilde, FEU Diliman, FEU Institute of Technology at San Sebastian College.
Batay sa abiso ng mga paaralan, iniiwas na nila ang kanilang mga estudyante at empleyado sa hirap ng biyahe sa harap ng pagsasara ng maraming kalsada simula sa araw na ito.
Ang Pasay City government ay nagdeklara na rin ng suspension of classes sa lahat ng antas.
By Len Aguirre
Inatake ng mga hindi pa nakikilalang suspek ang isang gasolinahan sa Kabacan, North Cotabato.
Pasado alas-8:00 kagabi nang atakihin ng mga suspek ang Petron gasoline station.
Tinutugis na ng mga otoridad ang 2 suspek na tumakas kaagad matapos ang insidente sakay ng motorsiklo.
Iniimbestigahan na ng mga otoridad ang posibleng motibo sa naturang pag-atake.
By Judith Larino
Tinutulungan na ng spy services ng Israel ang France sa imbestigasyon ng mga pag-atake sa Paris na ikinasawi ng mahigit 100 katao.
Ayon sa Israeli Media, nakakita na ang kanilang intelligence operatives ng clear operational link sa pagitan nang pag-atake sa Paris, suicide bombings sa Beirut at pagpapabsagsak sa isang Russian airlines sa Egyptian Sinai nitong nakalipas na October 31.
Mahigpit nang minomonitor ng spy services ng Israel ang Syria at Iraq kung saan nakabase ang malaking puwersa ng ISIS para sa mga impormasyon hinggil sa Paris attacks.
By Judith Larino
Tinambakan ng San Miguel ang Ginebra sa kanilang paghaharap kagabi sa Philsports Arena
Natutuwa si Coach Leo Austria sa aniya’y team effort at pagsunod ng kaniyang players sa game plan kaya’t napadapa nila ang Gin Kings sa final score na 100-82.
Nagsilbing bayani sa nasabing laban si Arwind Santos na gumawa ng 24 points at nag contribute rin si June Mar Fajardo ng 22 points samantalang kapwa nagtala naman ng tig-21 points sina Japeth Aguilar at Greg Slaughter sa panig ng Ginebra.
By Judith Larino
