June 2026

Nanindigan ang mga Lumad mula Mindanao na kanilang ipagpapatuloy ang protesta sa Maynila sa kabila ng mahigpit na seguridad para sa Asia-Pacific Economic Cooperation Summit, ngayong linggo.

Gayunman, pinaalis sa Liwasang Bonifacio ang tinatayang 700 demonstrador na karamiha’y Lumad bilang bahagi ng clearing operations para sa APEC.

Pansamantalang nagkakampo ang mga Lumad sa Redemptorist Church sa Baclaran, Parañaque City matapos maantala ang kanilang protestang tinaguriang “Manilakbayan.”

Ayon kay Manilakbayan Spokesperson Datu Jomorito Goaynon, mas determinado silang ituloy ang kanilang aksyon bilang pagpapakita ng galit laban sa pagbaliwala ng Aquino administration sa mga issue ng lumad partikular ang militarisasyon at pag-atake sa kanilang mga komunidad.

Bagaman pinaligiran ng mga pulis ang simbahan upang hindi umano makalabas ang mga demonstrador, itinanggi naman ni Parañaque Police Chief, Senior Supt. Ariel Andrade ang naturang ulat.

Idineploy anya ang mga pulis sa naturang lugar upang i-monitor ang APEC route at paalisin ang mga illegal vendor.

By  Drew Nacino 

Sarado na ang ilang kalsada simula kaninang alas-12:01 ng madaling araw patungo at mula sa PICC o Philippine International Convention Center kung saan gaganapin ang APEC Leaders Meeting.

Kabilang sa mga kalsadang ito ayon sa Manila District Traffic Enforcement Unit at Manila Traffic Parking Bureau ang:

- kahabaan ng Roxas Blvd north at southbound lane mula Katigbak patungong P. Ocampo,

- kahabaan ng Roxas Blvd Service Road mula Sta. Monica patungong P. Ocampo,

- kahabaan ng Quirino Avenue mula Roxas Blvd. patungong Adriatico,

- kahabaan ng Century Park St. mula Adriatico patungong Mabini St.,

- kahabaan ng Mabini St. mula P. Ocampo patungong Quirino Avenue,

- southbound lane ng Adriatico mula Quirino Avenue patungong Century Park St.,

- kahabaan ng P. Ocampo mula Adriatico patungong Roxas Blvd.

- kahabaan ng M.H del Pilar St. mula Sta. Monica st patungong Malvar St.,

- kahabaan ng Pedro Gil St. mula Roxas Blvd. patungong Mabini St.

Ipinalabas din ng traffic bureaus ang mga rutang uubrang daanan sa APEC week.

Samantala, bawal ang pagparada ng mga sasakyan sa service road ng Roxas Boulevard mula T.M Kalaw patungong President Quirino Avenues.

Mananatiling sarado ang mga nabanggit na lugar hanggang alas-12:00 ng madaling araw ng Biyernes.

By  Judith Larino 

Umaasa ang Armed Forces of the Philippines (AFP) na magiging mapayapa ang idaraos na Asia Pacific Economic Cooperation o APEC Meetings, ngayong linggo.

Ito’y sa kabila ng pangamba ng mga grupo na posibleng isabotahe ang aktibidad sa pamamagitan ng mga pag-atake gaya ng insidente sa Paris, France.

Ayon kay AFP Spokesman Col. Restituto Padilla, handa ang tropa ng gobyerno sa anumang scenario at daragdagan ang visibility sa lahat ng lugar.

Ito’y bilang bahagi ng security preparations para sa APEC leaders meeting sa Nobyembre 18 hanggang 19.

Hindi pa naman anya kailangang baguhin sa ngayon ang umiiral na security protocols dahil sa “terror attacks” sa Paris.

Samantala, inihayag naman ni Padilla na maliit ang presensya ng ISIS sa Pilipinas kahit pa may ilang Muslim rebel group na ang sympathizer ng pinaka-notorious na terror group sa mundo.

By  Drew Nacino