June 2026

Kumpiyansa si Senador Francis Escudero sa inilatag na seguridad ng pamahalaan para sa APEC Summit ngayong linggong ito.

Sinabi ng Senador, mataas ang kaniyang tiwala sa mga awtoridad ng Pilipinas matapos paigtingin pa ang seguridad sa bansa makaraan ang nangyaring pag-atake sa Paris nitong weekend.

Kasunod nito, nanawagan si Escudero sa publiko na makipagtulungan at unawain ang sitwasyon gayung hindi basta-bastang mga tao ang bibisita sa bansa.

Umapela pa ang Senador sa publiko na manalangin para sa matagumpay at mapayapang pagdaraos ng APEC sa bansa.

By Jaymark Dagala | Cely Bueno (Patrol 19) 

Umani ng kaliwa’t kanang batikos mula sa mga motorista’t biyahero ang ipinatutupad na seguridad para sa Asia Pacific Economic Cooperation o APEC Summit.

Tinawag na overacting ng ilan ang mga security measures dahil sa pagsasara ng ilang pangunahing kalsada tulad ng Roxas Boulevard, Macapagal Boulevard gayundin ng Coastal at Airport Road.

Inirereklamo rin ng mga pasahero ang mga pampublikong bus mula Cavite na nag-cutting trip ngunit nangingil ng buong pamasahe.

Apektado rin ang mga nagtatrabaho sa paligid ng Roxas Boulevard dahil bukod sa pagiging late sa trabaho, nasayang lamang ang kanilang oras sa paglalakad.

By Jaymark Dagala | Aya Yupangco (Patrol 5)  

Nanawagan si Catholic Bishops’ Conference of the Philippines (CBCP) President at Lingayen – Dagupan Archbishop Soc Villegas sa publiko na ipanalangin ang mga biktima ng terorismo sa Paris.

Sa kaniyang Facebook account, sinabi ng arzobispo na bukod sa mga biktima, dapat ding alayan ng panalangin ang mga nagluluksang mahal na buhay gayundin ang mga nasa likod ng pag-atake.

Hangad ni Villegas na maliwanagan ang puso’t isipan ng mga salarin upang mapanumbalik ang kanilang habag at awa sa sangkatauhan.

Tulad ni Pope Francis, mariing kinundena ni Villegas ang ginawang pag-atake sa Paris na ikinasawi at ikinasugat ng maraming inosenteng sibilyan.

By  Jaymark Dagala  

Hindi na makadadalo ang Mexican diplomat at economist na si Jose Anghel Gurria sa Asia Pacific Economic Cooperation o APEC Summit dito sa Pilipinas.

Ito’y makaraang kanselahin ng Organization for Economic Cooperation and Development ang kanilang biyahe matapos ang nangyaring pag-atake sa Paris, France.

Magsisilbi sanang panelist si Gurria bilang Secretary General ng OECD sa APEC sessions ngunit dahil sa pangyayari, nagpasya siyang kanselahin ang kaniyang biyahe.

Binubuo ng 34 na developed countries tulad ng Australia, Canada, Chile, Japan, Mexico, New Zealand, South Korea at Estados Unidos.

Ngunit kahit pa hindi miyembro ng OECD ang Pilipinas, aktibo pa rin ito sa pakikiisa sa mga inisyatiba tulad na lamang ng base erosion at profit shifting.

By Jaymark Dagala 

Sinugod ng mga militanteng grupo ang harapan ng Korte Suprema ngayong unang araw ng APEC week.

Sigaw ng grupo sa pangunguna ng Bagong Alyansang Makabayan o BAYAN Southern Tagalog ang tuluyang pagbabasura sa Enhanced Defense Cooperation Agreement o EDCA.

Ayon sa grupo, dapat kalimutan na ng pamahalaan ang EDCA dahil sa hindi naman makikinabang dito ang mga ordinaryong mamamayan.

Hiling din ng grupo na huwag nang tangkilikin pa ang APEC bagkus dapat na anila itong buwagin.

Giit ng grupo, nalulubog lamang anila sa kumunoy ang mga mahihirap na bansang kasapi nito dahil tanging ang mga mayayamang bansa ang nakikinabang sa APEC.

By  Jaymark Dagala  

Umaasa si Senadora Grace Poe sa paborableng resulta ng gagawing botohan ng Senate Electoral Tribunal o SET.

Inihayag ito ng senadora isang araw bago pormal na pagbotohan ng SET ang disqualification case na inihain laban sa kanya.

Sinabi ni Poe, hangad niya ang isang moral at ligal na pasya ng SET lalo’t nakasasalay aniya rito ang kapakanan ng lahat ng tulad niyang ampon sa bansa.

Sa sandaling paboran, sinabi ni Poe na kaniya itong iaalay bilang tagumpay ng milyung-milyong Pilipino na nagluklok sa kaniya sa puwesto bilang senador ng bansa.

By Jaymark Dagala | Cely Bueno (Patrol 19) 

Naunsyami ang dapat sana’y pagdinig ngayong araw sa bail motion ni Senador Jinggoy Estrada sa Sandiganbayan.

Ayon kay Atty. Marites Pagulayan, Clerk of Court ng Anti-Graft Court, ngayong araw sana tatanggapin ng korte ang pormal na pagsusumite ng mga ebidensya ng kampo ng senador.

Hindi naman binanggit ng opisyal kung pagpapasyahan pa o kung kailan pagpapasyahan ang pagsusumite ng ebidensya ng depensa.

By  Jaymark Dagala | Jill Resontoc (Patrol 7)