June 2026

Mananatiling nakataas ang alerto ng Philippine National Police (PNP) hangga’t hindi nakakaalis ang lahat ng delegadong dumalo sa APEC Summit.

Ayon kay Chief Supt. Wilben Mayor, Spokesman ng PNP, marami sa mga dumalo sa APEC Summit ang nais pang makapamasyal sa bansa kaya’t kailangan pa rin nilang tiyakin ang kanilang seguridad.

Maliban dito, nakaalerto rin anya ang PNP para naman sa pagbabalik sa Metro Manila ng mga nagsiuwian ng probinsya nitong nakaraang bakasyon.

“Malaking bagay po ang tinatawag na well-government approach na kung saan yung mga ahensya ng gobyerno ang nagtutulung-tulongan, yung security task force consisted po siya ng 20 agencies ito po ay magandang ehemplo ng pagtutulungan ng mga ahensya ng gobyerno at syempre po ng ating mamamayan” Pahayag ni Mayor.

By  Len Aguirre | Ratsada Balita  

Inalerto na ni Philippine National Police (PNP) Chief Dir. Gen. Ricardo Marquez ang kanilang mga tourist police dahil sa inaasahang pagbisita sa iba’t ibang tourist destination ng mga APEC delegate.

Kasunod ito ng opisyal na pagtatapos ng APEC leaders meeting, kahapon.

Ayon kay Marquez, tiyak na maraming delegado ang magpapaiwan upang mamasyal sa iba’t ibang bahagi ng Pilipinas.

Kabilang sa mga inaasahang bibisitahin ng mga foreign delegate ang Tagaytay, Batangas, Boracay, Palawan, Baguio at Pagudpud sa Ilocos Norte.

Tiniyak naman ni Marquez na mahigpit pa rin ang seguridad sa labas ng Metro Manila kahit tapos na ang APEC Summit.

By  Drew Nacino | Jonathan Andal 

Kumbinsido ang kampo ni Senador Grace Poe na hindi naniniwala ang publiko sa mga black propaganda at sunud-sunod na disqualification case laban sa mambabatas.

Ito ang inihayag ni Valenzuela City Mayor Rex Gatchalian, Spokesman ni Poe matapos manatiling numero uno ang senadora sa hanay ng mga presidentiable sa latest Pulse Asia survey.

Ayon kay Gatchalian, patunay lamang ito na mas nakatutok ang publiko sa adbokasiya ni Poe.

Kung titingnan anya ang petsang isinagawa ang survey ay saklaw na nito ang panahon ng sunud-sunod na disqualification case ni Poe sa Commission on Elections (COMELEC).

Dagdag ni Gatchalian, magsisilbi ring inspirasyon at gabay para kay Poe at sa running mate nitong Senator Chiz Escudero ang magandang resulta ng survey.

By  Drew Nacino 

Suportado ng Japan ang freedom of navigation na pinaiiral ng Amerika sa West Philippine Sea.

Ayon kay Yasuhisa Kawamura, tagapagsalita ni Japanese Prime Minister Shinzo Abe, hindi lamang “concern” ng Pilipinas ang territorial dispute kund maging ng buong international community.

Mayroon aniya silang tatlong prinsipyo na inaasahang susundin ng ibang bansa sa pagresolba sa agawan sa teritoryo.

Una ay kailangang may ligal na basehan ang claim ng anumang bansa; wala dapat gumamit ng puwersa upang solusyonan ang problema at dapat payapang resolbahin ang issue sa karagatan.

Samantala, inaasahang magbibigay ng military equipment ang Japan sa Pilipinas subalit wala umano itong kinalaman sa territorial dispute.

By Drew Nacino | Jonathan Andal  

Nanindigan ang Armed Forces of the Philippines (AFP) sa pina-iiral na “no-ransom policy” ng gobyerno tuwing may insidente ng kidnapping.

Ito ang inihayag ni AFP Spokesman, Col. Restituto Padilla, matapos pugutan ng Abu Sayyaf ang bihag nitong Malaysian na si Bernard Ghen Ted Fen sa Indanan, Sulu.

Ayon kay Padilla, walang kontrol ang pamahalaan sa direktang pakikipag-negosasyon ng pamilya ng mga kidnapp victim sa mga hostage-taker kaya’t hindi nila inirerekomenda sa mga kaanak na kausapin ang mga kidnapper.

Maingat din anya sila sa paglalabas ng mga impormasyon hinggil sa pinugutang malaysian dahil kailangan pa ng pruweba.

Samantala, muling iginiit ni Padilla na walang kaugnayan sa APEC meeting ang pagpaslang sa nasabing dayuhan.

By Drew Nacino

Silipin ang makatotohanang pagmimisyon at paglilingkod nito sa tao at hindi para sa sariling ambisyon.

Ito ang mahigpit na tagubilin ni Manila Archbishop Luis Antonio Cardinal Tagle habang binibigyang-diin na walang mararating ang bansa at lalong imposible ang pag-unlad nito kung ambisyon ng mga mauupong pinuno ang mananaig at hindi misyon na makapaglingkod.

Binitiwan ni Cardinal Tagle ang mensahe sa isang banal na misa para sa ika-40 taon ng neo catechumenal way sa Immaculate Concepcion Cathedral o Manila Cathedral.

Idinagdag pa ng puno ng Simbahang Katolika sa Pilipinas na maging sa simbahan, kapag ambisyon ang nangibabaw at hindi pagmimisyon ay nagiging mahina ang kabuuan nito.

By  Mariboy Ysibido  

Nakatakda nang pirmahan ni Pangulong Noynoy Aquino ang Sangguniang Kabataan (SK) Reform Act.

Ito’y matapos aprubahan ng Kamara ang bicameral conference committee report.

Ayon kay Camarines Sur Rep. Leni Robredo co-author ng House Bill No. 109, ipinadala na ang panukala sa Malakanyang para sa pirma ni Pangulong Aquino.

Ayon kay Robredo, isa sa mahalagang probisyon ng SK Reform Act ay ang anti-dynasty kung saan pagbabawalang tumakbo ang mga kamag-anak ng nahalal at nahirang na opisyal bilang miyembro ng SK, hanggang sa tinatawag na second level of consanguinity.

Itinaas din ang edad ng SK officials patungong 18 hanggang 24 taong gulang, upang maging ligal ang pagpasok nila sa mga kontrata at mapapanagot sa kanilang aksiyon.

By  Mariboy Ysibido