June 2026

Hinalughog ng mga tauhan ng PNP-Aviation Security Group at airport police department bomb disposal unit ang Ninoy Aquino International Airport o NAIA dahil sa bomb threat.

Sinasabing nakatanggap ng tawag ang isang telephone operator ng NAIA Terminal 1 kung saan sinabi umano ng caller na mayroong ikinalat na bomba sa tapat ng paliparan.

Dahil dito, agad na ikinalat ang mga bomb-sniffing dogs sa lahat ng terminal ng NAIA upang matiyak ang kaligtasan ng mga pasahero at mga delegado ng APEC.

By  Jelbert Perdez | Raoul Esperas (Patrol 45) 

Nananawagan si United Nations Secretary General Ban Ki-Moon sa mga bansa, organisasyon, at indibidwal na tugunan ang pagdurusa ng milyun-milyong bata sa buong mundo.

Sa kanyang mensahe kasabay ng Universal Children’s Day ngayong araw, tinukoy ni Ki-Moon ang mga batang biktima ng giyera, terorismo, karahasan at paglabag sa mga karapatang pantao.

Binigyang diin ni Ki-Moon na hindi ganap na nakatatanggap ng kanilang mga karapatan ang maraming paslit sa mundo kumpara sa kanilang mga ka-edad, at napagkakaitan ng masayang buhay at edukasyong lilinang sa kanilang mga kakayahan.

Ang Universal Children’s Day na ginugunita tuwing Nobyembre 20 ay itinatag Ng U.N. noong 1954 upang hikayatin ang bawat isa na itaguyod ang kapakanan ng mga bata sa iba’t ibang panig ng daigdig.

By  Jelbert Perdez 

Inilabas na ng Office of Transportation Security o OTS ang resulta ng imbestigasyon nito sa ‘tanim-bala scandal’ sa Ninoy Aquino International Airport o NAIA.

Ayon kay OTS Administrator Rolando Recomono, natuklasan nilang mayroong discrepancies o hindi pagkakatugma sa rekord ng mga pasahero na umano’y nahulihan ng bala.

Dahil dito, sinabi ni Recomono na sinibak nila ang 17 empleyado nito na sangkot sa naturang kontrobersiya.

Giit ni Recomono, kailangang ayusin na ang sistema sa paliparan partikular ang mga makina upang bumalik ang kumpiyansa ng publiko sa airport officials.

By Jelbert Perdez 

Minaliit ng Philippine National Police (PNP) ang banta ng mga militanteng grupo na kakasuhan nila ang mga pulis na nakapanakit sa kanila.

Ayon kay Chief Supt. Wilben Mayor, Spokesman ng PNP, kung tutuusin naging napakaluwag ng PNP sa mga militanteng nagsasagawa ng kilos protesta laban sa APEC Summit.

Makikita naman aniya sa mga video kung ang mga pulis ba o ang mga militante ang nagkamali kaya’t nauwi sa sakitan at bombahan ng tubig ang kilos protesta.

“Ang presence nila doon is illegal already, there was  no permit issued by the local government unit doon sa mga lugar na yun, naging lenient nga po ang Philippine National Police, pinabayaan natin silang na maghayag ng kanilang mga expressions, sentiments, makikita naman po kung sino ang nag-iinitiate ng gulo.” Ani Mayor.

Samantala, pumalag naman ang pamunuan ng Philippine National Police sa mga reklamo na di umano’y pinabayaan nila ang mga pulis na nagbantay sa APEC Summit.

Ayon kay Chief Supt. Wilben Mayor, Spokesman ng PNP, mismong si PNP Chief Director General Ricardo Marquez ang nag-ikot sa kinalalagyan ng mga pulis nang marinig ang mga reklamo hinggil sa hindi magandang pagkain at iba pa.

Pinaalalahanan ni Mayor ang mga pulis na sila ay mga lingkod bayan at ang unang dapat pinagtutuunan nila ng pansin ay kung paano maisasagawa ng maayos ang kanilang misyon.

Sa kabila nito, sinabi ni Mayor na mayroon nang rekomendasyon na bigyan ng isang araw na bakasyon ang mga pulis probinsya na kinuha nila para sa APEC Summit upang makapamasyal naman sa Metro Manila.

AUDIO: Bahagi ng panayam kay Chief Superintendent Wilben Mayor

By  Len Aguirre | Ratsada Balita