June 2026

Hindi pa natatagpuan ng Pambansang Pulisya ang katawan ng sinasabing Malaysian national na pinugutan bandidong Abu Sayyaf.

Ito ang ginawang paglilinaw ng Pambansang Pulisya kasunod na rin ng mga naglabasang ulat na nakita na umano ang katawan ni Bernard Then sa Indanan Sulu kamakalawa.

Ayon kay C/Supt. Wilben Mayor, tagapagsalita ng PNP, tanging ulo pa lamang ng biktima ang kanilang nakita noong Martes ngunit hindi pa rin kumpirmado kung ito nga ay kay Then.

Kanila na rin aniyang inatasan ang mga elemento ng Scene of the Crime Operatives o SOCO para kilalanin kung sa Malaysian national nga ang natagpuang ulo ng tao sa Sulu.

By  Jaymark Dagala | Allan Francisco 

Muli na namang uutang ng dalawang bilyong dolyar ang Pilipinas para maisaayos ang North-South Commuter Railway.

Layon nitong mapahusay ang mass transport capacity sa Metro Manila gayundin sa lalawigan ng Bulacan.

Bahagi ito ng nilagdaang kasunduan sa pagitan ng Pilipinas at Japan sa kasagsagan ng huling araw ng Asia Pacific Economic Cooperation o APEC Summit.

Ipinabatid din ng Japanese Prime Minister sa pangulo na kaniyang ipaaaral kung posible ang subway system sa bansa.

By Jaymark Dagala | Aileen Taliping (Patrol 23)  

Ilan pang heads of state at delegado ng APEC Summit ang nagsialisan na rin sa bansa ngayong araw.

Unang umalis si Canadian Prime Minister Justine Trudeau kung saan, nakangiti itong dumating sa Ninoy Aquino International Airport Terminal 2.

Agad naman sinalubong sa Bay 49 ng paliparan ang tinaguriang APEC hottie kung saan, kumaway ito at nagpasalamat sa mga Pilipino.

Bukod kay Trudeau umalis na rin ng bansa si Papua New Guinea Prime Minister Peter O’Niel gayundin si South Korean President Park Geun Hye.

Umalis na rin sa bansa si US President Barack Obama kung saan, didiretso ito sa Malaysia para daluhan naman ang ASEAN Summit.

By  Jaymark Dagala | Jonathan Andal 

Binalaan ng Commission on Audit o COA ang National Irrigation Administration o NIA sa paggamit nito ng mga hindi naibalik na pondo mula sa Disbursement Acceleration Program o DAP na nagkakahalaga ng P117 milyong piso.

Sa annual report ng COA, sinasabing nakalaan ang nasabing pondo para sa dalawang proyekto ng NIA na hindi naibalik sa National Treasury sa kabila ng kanilang abiso.

Partikular na tinutukoy ng COA ang Umayam River Irrigation Project sa Davao gayundin ang Casecnan Multi-Purpose Irrigation Power Project sa Rizal, Nueva Ecija.

Kalahating bilyong piso ang nagastos sa nasabing mga proyekto kaya’t dapat ibalik sa national treasury ang mga sumobrang pondo alinsunod na rin sa itinatakda ng batas.

Magugunitang idineklarang unconstitutional o labag sa batas ng Korte Suprema ang DAP noong isang taon na naglalayon sanang pabilisin ang pagpapatupad ng mga proyekto bilang bahagi ng pagpapalago sa ekonomiya.

By  Jaymark Dagala  

Pinag-aaralan na ngayon ng pamunuan ng Philippine National Police (PNP) ang pagsasampa ng kaso laban sa mga militanteng grupong nakipaggirian sa mga pulis.

Ito’y sa kasagsagan ng mga aktibidad sa idinaos na APEC Leader’s Meeting sa bansa.

Ayon kay PNP Spokesman C/Supt. Wilben Mayor, binuyo ng mga militante ang kanilang mga tauhan na siyang dahilan ng pagkasugat sa ilan sa mga ito.

Dumipensa naman si Mayor sa paggamit ng water cannons ng mga pulis sa pagsasabing pinalalamig lamang nito ang emosyon ng mga rallyista.

Kung tutuusin ayon kay Mayor, may pananagutan sa batas ang mga nasabing grupo dahil sa pagsasagawa ng pagkilos ng walang kaukulang permiso.

Gayunman, napanatili ng pulisya ang pagpapatupad ng maximum tolerance ngunit tila inabuso pa rin ito ayon kay Mayor ng mga militante.

By  Jaymark Dagala | Jonathan Andal 

Pinapurihan ni Senador JV Ejercito si Pangulong Noynoy Aquino sa matagumpay na pagdaraos ng Asia Pacific Economic Cooperation o APEC Summit.

Ayon sa senador, mahalaga ang pangyayaring ito para sa bansa kaya’t maganda na naging mapayapa ang pagdaraos nito.

Gayunman, umaasa si Ejercito na hindi na sa Maynila muling gaganapin ang susunod na APEC Summit dahil sa masyado na itong congested o masikip na siyang nagdulot ng matinding parusa at sakripisyo mula sa mga taga-rito.

Marami pa naman aniyang ibang lugar sa Pilipinas na maaaring pangyarihan ng ganitong pagtitipon tulad ng Cebu, Iloilo at Clark na minsan nang nagsilbi bilang lokasyon para sa APEC.

By  Jaymark Dagala | Cely Bueno (Patrol 19)  

Muling humingi ng pang-unawa sa publiko ang pamunuan ng Armed Forces of the Philippines (AFP) at Philippine National Police (PNP).

Ito’y bunsod pa rin ng mahigpit na seguridad sa APEC Summit na nakaapekto sa maraming motorista at mananakay sa Kalakhang Maynila.

Ayon kay AFP Spokesman Col. Restituto Padilla, kaya mahigpit ang pagbabantay ng mga pulis sa iba’t ibang panig ng Metro Manila dahil kung ano ang treatment kay Pangulong Noynoy Aquino ay ganoon din sa mga delegado.

Kinumpirma naman ni Padilla na tinanggal na ng AFP ang ipinatupad na ‘no sail zone’.

“No sail zone was lifted simula nang matapos ang meeting sa PICC kagabi.” Ani Padilla.

Mahigpit na seguridad sa APEC walang impluwensya ng mga dayuhan

Samantala, iginiit ng Armed Forces of the Philippines o AFP na mga Pilipino lamang ang nagplano ng security measures na ipinatupad sa katatapos pa lamang na APEC Summit.

Sa harap na rin ito ng pagbatikos ng ilang kritiko na may impluwensya ang ibang bansa sa mahigpit na pagpapatupad ng seguridad dahil sa pagdaong ng USS Fitzgerald ng Amerika gayunin ng BNS Somudra Avijan ng Bangladesh.

Ayon kay Padilla, bahagi lamang ng port calls kaya nasa karagatan ng bansa ang dalawang barkong pandigma at wala itong kinalaman sa APEC Summit.

Lahat aniya ng ipinatupad nilang seguridad ay masusing pinagplanuhan, pinag-isipan at pinag-aralan ng sandatahang lakas gayundin ng pambansang pulisya.

By Jelbert Perdez | Jaymark Dagala