Nagkukumahog na ang mga magsasaka sa probinsiya ng Isabela sa pagpapatuyo ng kanilang mga inaning palay.
Ito ay dahil sa banta ng malakas na ulang dala ng bagyong Marilyn.
Ayon sa ulat, maaaga pa lamang kanina ay isinasako na ng mga magsasaka ang mga inani nilang palay.
Matatandaang kahapon nang pumasok sa Philippine Area of Responsibility (PAR) ang bagyong Marilyn na may international name In-fa.
By Ralph Obina
Nagpakitang Gilas ang UP Pep Squad sa katatapos lamang na 2015 Cheerleading World Championships na ginanap sa Berlin.
Ito ay kung saan nakalaban ng Pilipinas ang mahigit 1,000 kalahok mula sa 20 bansa.
Nasungkit ng UP Pep Squad ang 3 silver medal para sa junior cheer dance doubles, cheer dance doubles at cheer all female.
Maliban dito, naiuwi din ng UP Pep Squad ang dalawang bronze medal para naman sa cheerleading doubles at small groups mixed.
Matatandaang kapapanalo lamang din ng UP Pep Squad ng bronze at silver medal sa 7th edition ng Cheerleading World Championship na ginanap naman sa Bangkok.
Ang UP Pep Squad ay pumangatlo lamang sa UAAP Cheerdance Competition noong Oktubre.
By Ralph Obina
Photo by AFVD
Target ng Commission on Elections (COMELEC) na mapataas ang bilang ng mga Pilipino sa ibang bansa para bumoto sa May 2016 Presidential elections.
Ayon kay Chairman Andres Bautista, umaasa silang papalo sa kalahating milyong mga Pilipino sa ibayong dagat ang hindi lamang magpaparehistro kundi talagang boboto.
Sa tala ng Department of Foreign Affairs (DFA), sa kauna-unahang pagkakataon ay pumalo ng higit 1 milyon ang nagpatala para sa overseas absentee voting para sa susunod na taon.
Malayo ito sa higit 700,000 mga nagparehistro noong 2013 midterm elections at higit sa kalahating milyon naman noong 2010 presidential elections.
By Rianne Briones
Magdadala ng direct at indirect benefits sa food at agriculture sector ang kooperasyon ng Pilipinas sa mga kapwa nito miyembro ng Asia Pacific-Economic Cooperation o APEC.
Ayon kay Jollibee Foods Corporation Chairman Tony Tan Caktiong, malaki pa rin ang papel ng imprastraktura sa pagpapaba ng cost of transport ng agricultural goods mula sa mga farmland patungo sa mga lungsod.
Makatutulong anya ang pagsasaayos sa imprastraktura sa food at agriculture industry upang mapabilis ang daloy ng mga produkto at mapababa ang presyo ng mga pangunahing bilihin.
Aminado si Caktiong na sadyang mataas ang presyo ng mga agricultural product sa bansa at ito ay malaking hamon para sa Pilipinas maging sa ilan pang APEC member economy sa Southeast Asia.
Idinagdag din ng negosyante na hindi dapat mapag-iwanan ang Pilipinas sa halip ay dapat makasabay sa global community.
By Drew Nacino
Inaasahang magagamit na rin sa Manila-Cavite Expressway o CAVITEX ang beep cards ng LRT at MRT.
Ito, ayon kay AF Payments Incorporated CEO Peter Maher, ay bahagi ng kanilang expansion matapos umabot sa P1.3 million ang card sales, ngayong taon.
Nakikipag-ugnayan na anya sila sa pamunuan ng CAVITEX at posibleng bago mag-Pasko ay magagamit na ang mga beep card sa nasabing Expressway.
Plano rin ng kumpanya na maglagay ng loading station ng beep cards sa mga convenience store sa susunod na taon.
By Drew Nacino
Dapat bilisan ng administrasyong Aquino ang paglalatag ng mga hakbang upang maiwasan ang malaking epekto sa agrikultura ng matinding El Niño phenomenon sa susunod na taon.
Ayon kay Philippine Confederation of Grains Associations President Herculano “Joji” Co, dapat tutukan ng gobyerno ang mga Irrigation Project.
Ipinaliwanag ni Co na ang irigasyon ay isang “crucial element” para sa rice culture upang makamit din ang food security lalo sa susunod na taon.
Bukod dito, dapat din anyang matiyak kung saan napunta ang inilaang P13 billion-peso budget ng National Irrigation Administration at kung hiwalay ito sa P10 billion pesos na inanunsyo ni Agriculture Secretary Proceso Alcala na gagamitin para sa irigasyon.
By Drew Nacino
Muling nanawagan ang China sa iba pang bansa lalo sa mga kapwa claimant na iwasan ang panggugulo sa South China Sea.
Ito ang inihayag ni Chinese Deputy Foreign Minister Liu Zhenmin matapos igiit na walang intensyon ang Tsina na i-militarize ang ilang bahagi ng Spratly Islands sa kabila ng kanilang lumalawak na aktibidad sa mga pinag-aagawang isla.
Ayon kay Liu, idinesenyo ang mga artificial island sa Spratly para lamang sa “public service” upang tulungan ang mga barko at mangingisda lalo kung may mga kalamidad.
Bagaman may mga itinayong military facility sa ilang bahagi ng Spratly’s, hindi aniya makatuwiran na iugnay ang mga ito sa militarisasyon ng buong South China Sea.
Iginiit ng opisyal na sa halip na manggulo ay dapat maging daan ang ibang claimant upang maging mapayapa ang Asia-Pacific region.
By Drew Nacino
Kumpiyansa si Malaysian Prime minister Najib Razak na matatapos ang Bangsamoro Peace Process bago bumaba sa puwesto si Pangulong Benigno Aquino III sa June 2016.
Ito ang inihayag ni Razak sa 27th Association of Southeast Asian Nations o ASEAN Summit na kinabibilangan ng Pilipinas.
Nagbigay-pugay din si Najib sa mga outgoing leader sa pangunguna nina Pangulong Aquino at Myanmar President Thein Sein sa closing ceremony ng ASEAN Summit sa Kuala Lumpur, Malaysia.
Naniniwala rin si Razak na ang Bangsamoro Peace Process ang tatatak sa kasaysayan ng Pilipinas at pinakamalaking pamana ni Pangulong Aquino sa bansa.
Bagaman maraming balakid, pursigod ang Aquino administration na ipasa sa kongreso ang Bangsamoro Basic Law bago matapos ang termino ng Pangulo sa susunod na taon.
By Drew Nacino
Tutol ang Armed Forces of the Philippines (AFP) sa plano ng grupong “Kalayaan Atin Ito” na magpadala ng 10,000 youth volunteers sa Kalayaan Islands sa Palawan bilang protesta sa pananakop ng China sa West Philippine Sea.
Ayon kay Western Command Chief, Vice Admiral Alexander Lopez, maaaring malagay sa peligro ang buhay ng mga volunteer mula sa 81 lalawigan dahil sa “unpredictable sea conditions.”
Hindi aniya marahil batid ng grupo kung gaano kadelikado ang paglalayag sa karagatan lalo’t may kalakasan ang alon.
Magugunitang inihayag ng kalayaan atin ito na isang buwan ang itatagal ng kilos protesta o mula November 30 hanggang December 30 kaya’t nangangailangan sila ng suporta sa pamamagitan ng donasyon.
By Drew Nacino
Hati pa rin ang mga education reform advocate kung ipagpapaliban o hindi ang K to 12 program.
Ayon sa private sector group na Philippine Business for Education o PBED, ang kawalan ng access sa utilities ang dapat na maging sanhi ng pagpapatigil sa implementasyon ng senior high school program na bahagi ng K to 12.
Naniniwala naman ang Alliance of Concerned Teachers na hindi magtatagumpay ang naturang programa hangga’t hindi nireresolba ng gobyerno ang mga pangunahing problema kabilang na ang supply ng kuryente at tubig.
Sa panig ng suspend K-12 Coalition, hindi pa umano handa ang pamahalaan sa pagpapatupad ng K to 12 sa halip ay dapat itaas muna ang budget sa sektor ng edukasyon.
Gayunman, ilang public schools na ang magpapatupad ng mga pagbabago sa kanilang curriculum nang hindi nabibigyan ng basic services gaya ng water at electricity supply.
By Drew Nacino