June 2026

Tanggap ni Philippine National Police (PNP) Chief Director General Ricardo Marquez ang pagbansag sa kanila na “OA” o “overacting” sa kanilang ipinatupad na mga hakbanging pangseguridad sa nakaraang APEC Summit.

Ayon kay Marquez, hindi na baleng maging “overacting” o “overkill” kaysa naman mag-sorry sa huli kung kailan mayroon nang nasaktan o napahamak sa kanilang maluwag na security protocol.

Gayunman, sinabi ng PNP Chief na natutuwa silang makarinig mula sa mga delegado na Pilipinas ang maituturing nilang pinakamagaling na nakapag-host ng nadaluhan nilang APEC meeting.

By Jelbert Perdez  

Kaya ng gobyerno na tustusan ang libreng edukasyon sa kolehiyo sa buong bansa.

Sa Boses ni Juan ng Karambola, sinabi ni Senatorial candidate at Valenzuela City Representative Sherwin Gatchalian na P12 bilyong piso lamang ang kakailanganin para makapag-aral ng libre ang lahat ng mga kabataang Pilipino.

Katumbas lamang ito ng .4 percent ng ating pambansang budget.

Ipinabatid ni Gatchalian na 8 sa 10 mga batang Pinoy ang di nakakapag-aral dahil sa kawalan ng pera.

“Pino-propose ko sa higher education para unang-una yung mga batang nag-aaral na ngayon ay makapagtapos at yung mga gusto pang mag-aral eh makakapag-aral, out of 10 kids who enter elementary only 6 will graduate, and only 4 will graduate high school, and only 2 will graduate higher education.” Pahayag ni Gatchalian.

By  Ralph Obina | Karambola   

Naitala ang pinakamalamig na temperatura sa Baguio City ngayong taon.

Ito’y makaraang pumalo sa 13 degrees celsius ang temperatura sa City of Pines.

Kaya naman, tuwang-tuwa ang mga nagsipagbakasyon sa lungsod dahil sa paskong-pasko na ang kanilang pakiramdam.

Ayon sa Philippine Atmospheric Geophysical and Astronomical Services Administration (PAGASA), asahan nang bababa pa ang temperatura sa Baguio City pagsapit ng Disyembre hanggang Enero ng susunod na taon.

Samantala, dahil naman sa inaasahang pagdagsa ng mga turista, nag-umpisa nang maghigpit ang mga otoridad upang matiyak ang kanilang seguridad sa lugar.

By  Ralph Obina 

Ipinanawagan ng ilang kongresista ang pagpapatigil sa pangongolekta ng irrigation service fees.

Kasabay nito, itinutulak din ng mga mambabatas sa pangunguna nina Fernando Hicap at Neri Colmenares ang House Bill 6224 o “Free Irrigation Services Act of 2015.”

Sa ilalim ng kasalukuyang batas, pinagbabayad ang mga magsasaka sa pagpapaayos ng irigasyon na dagdag-pasanin umano ng mga ito.

Subalit, giit ni Hicap, obligasyon ng gobyerno na magbigay ng nararapat at mahalagang suporta at serbisyo para sa mga magsasaka.

Ayon kay Hicap, sa pamamagitan ng irigasyon ay mapapaangat ang productivity ng mga magsasaka sa bansa lalo na ang produksiyon ng palay at mais.

By Jelbert Perdez  

Itinaas ng Bureau of Fisheries and Aquatic Resources o BFAR ang shellfish ban sa dalawang baybaying dagat at mga katubigan sa mga probinsya ng Leyte, Samar at Biliran.

Ito’y dahil sa presensya ng nakalalasong red tide sa mga baybayin sa naturang rehiyon sa pamamagitan ng laboratory analysis.

Bunsod nito, ipinagbabawal ang pangunguha, pagbebenta, at pagkain ng shellfish mula sa mga naturang probinsiya.

Kabilang sa mga nagpositibo sa red tide ang Cambatutay Bay sa Samar; Carigara bay sa Leyte; Naval, Caibiran, Culaba, Kawayan, at Cabucgayan sa Biliran; at Daram at Villareal sa Samar Province.

By Jelbert Perdez