Sa #SiyasatExpress, laglag bala o tanim-bala sa NAIA, sino nga ba ang dapat panagutin?
Umapela si Senator Chiz Escudero sa gobyerno na huwag lang basta taasan ang suweldo ng mga empleyado ng gobyerno bagkus ay ibaba mismo ang kinokolektang income tax rate.
Ayon kay Escudero, sa ganitong paraan hindi lamang mga government employees kundi maging ang mga nasa pribadong sektor ay makikinabang dito.
Aniya, ang ipinapataw na 32 percent income tax ang siyang pinakamalaki sa Southeast Asia.
Matatandaang inindorso na ni Pangulong Benigno Aquino III sa Kogreso ang panukalang batas na Salary Standarization Law of 2015 na magbibigay ng mas mataas na kompensasyon sa mga opisyal at ilang mga empleyado ng gobyerno.
By Rianne Briones
Napanatili ng San Miguel Beermen ang pangunguna nito sa standing ng 2016 Smart Bro PBA Philippine Cup matapos talunin ang Barako Bull Energy.
Nakapagtala na ang Beermen ng 5-1 win loss record samantalang 3-3 naman ang Barako Bull.
Nanguna si June Mar Fajardo sa panalo sa San Miguel matapos magtala ng 28 puntos at nakagawa naman ng 19 na puntos si Ronald Tubid.
By Judith Larino
Nakiisa na rin si Manila Auxiliary Bishop Broderick Pabillo sa panawagang patalsikin na sa puwesto si Manila International Airport Authority (MIAA) General Manager Jose Angel Hornado.
Kabilang si Pabillo sa mga lumagda sa online petition na palitan na sa puwesto si Honrado kasunod ng tanim-laglag bala controversy sa paliparan.
Ayon kay Pabillo, malinaw na resulta ng incompetence ang kontrobersiyang bumabalot ngayon sa NAIA.
Sino man aniyang incompetent sa kanyang trabaho ay dapat na palitan na sa kanyang upwesto.
Sinimulan ng grupong Migrante International ang naturang petisyon na sa ngayon ay nakakalap na ng halos 12,000 mga lagda.
By Rianne Briones
Hindi pa rin kuntento ang mga militanteng mambabatas sa usad-pagong na pagbibigay katarungan sa 58 biktima ng Maguindanao massacre.
Ayon kina Bayan Muna Representatives Neri Colmenares at Carlos Zarate, naniniwala sila na mailap pa rin ang hustisya para sa mga biktima at nagpapatuloy ang paghahari ng “state of impunity” o special treatment sa bansa.
Nakapagtataka anilang nakagagamit pa ng mga legal remedy ang pamilya Ampatuan na upang irepaso ang kaso mula sa Department of Justice, Court of Appeals hanggang Supreme Court.
Iginiit nina Colmenares at Zarate na hindi nila mabatid kung bakit tila inaamag ang kaso gayong umaapaw na sa ebidensya na magdidiin sa mga akusado.
Umaasa naman ang dalawang kongresista na makakamtan din ng mga biktima at kanilang pamilya ang katarungan sa lalong madaling panahon.
By Drew Nacino
Tumulak na pa-China si Miss World Philippines 2015 Danielle Parungao para sa 2015 Miss World sa December 19.
Naging emosyonal ang pambato ng Pilipinas sa 2015 Miss World Beauty Pageant sa kanyang send off sa NAIA lalo na’t mag-isa lamang itong bumiyahe.
Tiniyak ni Parungao na gagawin niya ang lahat para mauwi ang korona at magbigay ng karangalan sa bansa na una nang ginawa ni Megan Young nang makuha ang korona n0ong 2013.
Bitbit ng beauty queen ang figurine ni Mama Mary, rosaryo at mga larawan ng kaniyang pamilya at mga kaibigay para magsilbing inspirasyon sa tatahakin niyang kumpetisyon.
Bitbit din ni Parungao ang gown na gawa ni Mak Tumang at siyang susuotin niya sa evening gown competition.
Humihingi ng suporta at dasal si Parungao mula sa kapwa Pilipino lalo na yung mga aktibo sa social media para magtagumpay sa nasabing beauty pageant.
By Judith Larino
Pumapalo na sa halos 90 katao ang patay at mahigit 100 ang nawawala sa landslide malapit sa Jade Mine sa northern Myanmar.
Ayon sa isang Jade businessman, maraming labi ang narekober mula sa bumagsak na lupa sa bahagi ng Kachin State.
Tuluy-tuloy naman ang search and retrieval operations sa naturang lugar.
Ipinabatid ng ilang testigo na karamihan sa mga nasawi ay mga ordinaryong tao na naghahanap-buhay lamang sa pamamagitan nang pag-akyat sa nasabing waste material dumped site para makakuha ng mga itinatapon na Jade.
Dose-dosenang mga kubo din ang nabaon sa lupa.
By Judith Larino
Photo Credit: bbc.com
Nabuhayan ng pag-asa at natutuwa ang mga supporter ni Davao City Mayor Rodrigo Duterte.
Kasunod na rin ito nang anunsyo mismo ni Duterte sa pagpalaot sa 2016 Presidential elections.
Kinumpirma na rin sa DWIZ ni Kapitan Mar Masanguid, Founder at National President ng Duterte for President Movement ang pagbabago ng isip ni Duterte matapos madismaya sa pagpabor ng SET o Senate Electoral Tribunal kay Senador Grace Poe sa disqualification case na kinakaharap nito.
“Kahapon din sa Cebu si Mayor nag-confirm na na siya’y tuluy na tuloy na, talagang wala nang kawalayan, meron na siyang appointment pero meron na siyang interview kahapon lang na nag-confirm na siya para malaman ng mga taga-Luzon at supporters ni Mayor Duterte na sa wakas ay nakuha na natin ang ating pangarap na maging pangulo ng ating bansa si Duterte.” Pahayag ni Masanguid.
Running for President
Desidido ng tumakbo sa pagka-pangulo sa 2016 elections si Davao City Mayor Rodrigo Duterte.
Ito ang inihayag ni Duterte nang dumalo sa birthday celebration ng kanyang kaklase sa law school sa Dasmariñas, Cavite.
Ayon kay Digong, ang nagpabago sa kanyang isip ay ang desisyon ng Senate Electoral Tribunal na nagbasura sa disqualification case na kumukuwestyon sa citizenship ni Senador Grace Poe na inakusahang hindi umano natural-born Filipino.
Iginiit ng alkalde na tanging ang tunay na Filipino ang dapat mahalal sa pinakamataas na posisyon at hindi katanggap-tanggap ang isang Amerikanong pangulo.
Gayunman, inamin ni Duterte na kailangan pa niyang kausapin ang mga miyembro ng PDP-Laban sa pangunguna ni Senator Koko Pimentel hinggil sa kanyang pasya.
Samantala, inamin ni Davao City Mayor Rodrigo Duterte na hiniling noon ni Senator Grace Poe na maging kanyang running mate para sa 2016 Presidential elections.
Gayunman, nagbago ang desisyon ni Poe na maging bise presidente ni Duterte matapos lumabas ang resulta ng survey kung saan nanguna ang senador sa presidential race.
Ayon kay Duterte, mismong si dating Foreign Affairs Secretary Alberto Romulo na kapitbahay ng mambabatas sa Corinthian Gardens, Quezon City ang namagitan upang kanyang maging running mate.
Hindi naman idinetalye ni Digong kung kailan at saan naganap ang nasabing pulong.
By Judith Larino | Balitang Todong Lakas | Drew Nacino
Balik Pilipinas na ang Pangulong Benigno Aquino III matapos dumalo sa 27th ASEAN Summit sa Kuala Lumpur, Malaysia.
Alas-2:30 kaninang madaling araw nang lumapag sa Ninoy Aquino International Airport (NAIA) ang sinakyang eroplano ng Pangulong Aquino.
Sa nasabing pulong, kinumpronta umano ng Pangulo ang China sa patuloy na akbitidad sa West Philippine Sea tulad ng konstruksyon ng China ng artificial island.
Kabilang sa mga tinalakay sa nasabing pulong ang isyu ng terorismo at agawan ng teritoryo sa West Philippine Sea.
By Judith Larino | Jopel Pelenio (Patrol 17)
Photo Credit: gov.ph
Bahagyang humina at bumagal ang bagyong Marilyn matapos pumasok sa Philippine Area of Responsibility (PAR), kahapon.
Huling namataan ng Philippine Administration Geophysical and Astronomical Services Administration (PAGASA) ang bagyo sa layong 913 kilometro, silangan hilagang-silangan ng Virac, Catanduanes o 1175 kilometro, silangan ng Baler, Aurora.
Taglay ng bagyong Marilyn ang lakas ng hanging aabot sa 160 kilometro bawat oras at pagbugso na hanggang 195 kilometro kada oras.
Ayon sa PAGASA, inaasahang tatahakin ng bagyo ang direksyong pa-kanluran hilagang-kanluran sa bilis na dalawampung kilometro bawat oras.
Dahil dito, asahan na ang pag-ulan sa Batanes, Calayan at Babuyan Group of Islands, ilang bahagi ng Mindanao, Bicol Region maging sa silangan at gitnang Visayas.
Hinahatak ng nabanggit na sama ng panahon ang mga kaulapan na nagmumula sa kanluran na maghahatid naman ng mga pag-ulan.
By Drew Nacino