Patay ang dalawang hinihinalang holdaper nang maka-engkuwentro ng mga awtoridad sa Malolos, Bulacan.
Ayon kay Superintendent Heryl Bruno, Hepe ng Malolos Police Station, hinoldap ng mga suspek ang restaurant manager na si Yulbert de Guzman habang nakatayo ito sa kahabaan ng McArthur Highway sa barangay Bulihan.
Ang biktima ay dinala ng mga suspek sa isang madilim na lugar kung saan kinuha ang kanyang cellphone at cash.
Nakapagsumbong ang biktima sa mga pulis na kaagad nagsagawa ng operasyon at natiyempuhan ang mga suspek sa Ople Road sa parehong barangay na sakay ng motorsiklo.
Nakipagbarilan pa ang mga suspek subalit napatay ang mga ito sa pagganti ng putok ng mga awtoridad na inaalam kung bahagi ng anong robbery group ang mga suspek.
—-
