Dumating na sa bansa ang nasa 2.2-milyong doses ng Pfizer COVID-19 vaccine nitong gabi ng Huwebes, ika-10 ng Hunyo.
Ayon sa National Task Force Against COVID-19, dumating sa Ninoy Aquino International Airport (NAIA) Terminal 3 ang mga bakunang nagmula sa COVAX facility dakong alas-8:30 ng gabi.
Sa isang Twitter post, sinabi ni presidential assistant on foreign affairs and chief presidential protocol, Robert Borje, na 210,000 doses ng mga bakunang ito ay ipinadala sa Cebu habang 110,000 doses naman ang para sa Davao City.
Ang mga nalalabing bakuna naman ay para sa National Capital Region.
Samantala, ito na ang ikalawang shipment ng Pfizer vaccines dito sa Pilipinas kung saan, una rito ang nasa 193,050 doses na dumating sa bansa noong ika-10 ng Mayo.
