1 miyembro ng ASG patay at 34 drug suspect timbog sa Sulu

Patay ang isang hinihinalang miyembro ng Abu Sayyaf Group habang tatlumpu’t apat (34) na mga drug suspect ang naaresto sa isinagawang raid ng mga awtoridad sa Patikul Sulu.

Ayon kay Brigadier General Cirilito Sobejana, Commander ng Joint Task Force Sulu, sinalakay ng pinagsanib na pwersa ng mga pulis at militar ang Barangay Danag bilang bahagi ng anti-drug campaign sa lalawigan.

Aniya, pagsapit ng raiding team sa nasabing barangay ay agad silang pinaulanan ng mga bala ng tinatayang labinglimang (15) armadong kalalakihan, dahilan kaya gumanti sila ng putok.

Tumagal ang palitan ng putok ng halos labing lima (15) hanggang beinte (20) minutos kung saan napatay ang isang hinihinalang Abu Sayyaf member at ikinasugat ng isang sundalo.

Bukod sa mga naarestong drug suspect, nasabat ng mga awtoridad ang isang M16 rifle, tatlong kalibre kuwarenta’y singkong baril, limang (5) granada at tatlong (3) sachet ng hinihinalang shabu.

By Krista de Dios

Comments

comments