P1M reward sa kada miyembro ng ASG alok ng Pangulo

Nag-alok si Pangulong Rodrigo Duterte ng isang (1) milyong pisong pabuya para sa bawat Abu Sayyaf na maituturo at mapapatay sa lalawigan ng Bohol.

Inihayag ito ng Pangulo sa kaniyang pagbisita sa lalawigan upang personal na inspeksyunin ang mga ginagawang paghahanda sa ASEAN Summit gayundin ang pagsisimula ng Regional Economic Partnership Trade Negotiating Committee Meeting sa Panglao Island.

Nagbabala rin ang Pangulo, may kalalagyan din ang sinumang mapatutunayang nagpapagamit at nakikipagsabwatan sa mga bandido.

PAKINGGAN: Bahagi ng pahayag ni Pangulong Rodrigo Duterte

AFP

Samantala, malugod na tinanggap ng AFP o Armed Forces of the Philippines ang alok ni Pangulong Rodrigo Duterte na isang milyong pisong pabuya para sa bawat miyembro ng Abu Sayyaf na maituturo at mapapatay sa Bohol.

Ayon kay sa AFP Spokesman Brigadier General Restituto Padilla, kanilang inaasahan na dahil sa alok na pabuya ay mahihikayat ang publiko na tumulong para tuluyang mapulbos ang bandidong grupo.

Aniya, lubos ding nagpapasalamat ang Hukbong Sandatahan ng Pilipinas sa naging pahayag ng Pangulo.

Sa kasalukuyan ay nagpapatuloy ang operasyon ng militar para matunton ang mga nalalabi pang miyembro ng Abu Sayyaf na naka-engkwentro ng tropa ng pamahalaan sa Inabanga Bohol noong nakaraang linggo.

By Jaymark Dagala  | Krista de Dios | with report from Aileen Taliping (Patrol 23) 

Comments

comments