Ipina-subpoena na ng Senate Impeachment Court si Commission on Audit Auditor Celine May Del Campo para tumestigo sa impeachment trial ni Vice President Sara Duterte.
Inaasahang haharap si Del Campo sa Impeachment Court ngayong araw o sa mga susunod na paglilitis upang ipagpatuloy ang paglalahad ng mga audit findings kaugnay ng confidential funds ng Office of the Vice President at Department of Education.
Ayon kay Senate Impeachment Court Presiding Officer Francis “Chiz” Escudero, pagdedesisyunan pa ng korte kung maglalabas din ng panibagong subpoena para kay House Legislative Information Resources Management Department Director Marivic Pareja.
Nakadepende anya ito sa magiging pasya ng korte sa mosyon ng House prosecution na kilalanin sa pamamagitan ng judicial notice ang mga pagdinig ng House Committee on Good Government and Public Accountability at Committee on Justice.
Samantala, kinumpirma ni Lead House Prosecutor Gerville Luistro na magsusumite ang prosekusyon ng panibagong listahan ng mga testigo at mga kahilingan para sa subpoena ngayong araw. l mula sa panulat ni Jordan Gutierrez
