Tiniyak ni House Speaker Faustino Dy III na ipaprayoridad ng Kamara ang pagpasa ng mahahalagang panukala sa Second Regular Session ng 20th Congress.
Kasunod ito ng pagbubukas ng sesyon, kung saan sinabi ni Dy na kabilang sa mga prayoridad ang Rice Industry and Consumer Empowerment o RICE Act; mga amyenda sa Universal Health Care Law; Cadena Bill; at ang Cybersecurity Bill.
Ayon sa lider ng Kamara, layunin ng RICE Act na mapababa ang presyo ng bigas habang pinalalakas ang suporta sa mga lokal na magsasaka.
Napapanahon din aniyang amyendahan ang Universal Health Care Law upang maging mas dekalidad, abot-kamay, at abot-kaya ang serbisyong pangkalusugan para sa mga Pilipino.
Dagdag pa ni Dy, isusulong din ang Cadena Bill upang higit na maging bukas at transparent ang paggamit ng pondo ng bayan, gayundin ang Cybersecurity Bill para maprotektahan ang publiko laban sa mga banta sa digital space at social media.
Binigyang-diin ni Speaker Dy na hindi sapat ang pagpasa lamang ng mga batas kaya dapat tiyakin na ang mga ito ay tunay na mararamdaman ng mamamayan at magdudulot ng positibong pagbabago sa kanilang buhay.
Aniya, itutuloy ng Kamara ang pagtatrabaho para maisulong ang mga repormang direktang tutugon sa araw-araw na suliranin ng mga Pilipino. | via Geli Mendez/DWIZ Patrol
