Iginiit ng kampo ni Vice President Sara Duterte na kailangan muna ng pag-apruba ng Pangulo bago maisapubliko o maibigay sa Senado bilang impeachment court ang kanyang tax records.
Ayon kay Defense Counsel Atty. Michael Poa, mahigpit na pinoprotektahan ng National Internal Revenue Code ang impormasyon ng mga nagbabayad ng buwis at maaari lamang itong ilabas sa mga itinakdang exemption ng batas.
Aniya, isa sa mga exemption ay ang pag-apruba ng Pangulo, batay sa rekomendasyon ng Secretary of Finance.
Dahil dito, kinuwestiyon ng depensa ang subpoena para sa tax at financial records ng Bise Presidente, dahil sinasabing masyado itong malawak at hinihingi pa ang lahat ng dokumento.
Samantala, binigyang-diin din ni Atty. Poa na kahit maisumite ang mga dokumento sa impeachment court, hindi ito nangangahulugang otomatiko na itong maituturing na ebidensya, dahil kailangan pa rin itong dumaan sa wastong proseso bago tanggapin bilang bahagi ng paglilitis.—sa panulat ni Reabelle Medina
