Halos 2,000 pasahero ang stranded sa mga pantalan sa Bicol region dahil sa epekto ng tropical depression Amang.
Batay sa datos ng Philippine Coast Guard (PCG), 1,918 ang kabuuang bilang ng mga pasaherong naantala ang biyahe sa dalawang pantalan kabilang na ang Sorsogon at Albay dahil sa masamang panahon.
Kinansela rin ang nasa 258 na biyahe mula sa Matnog Port; 54 sa Pilar Port; 275 sa Pioduran, Albay; at 14 naman sa Tabaco, Albay.
Samantala, hindi rin pinapayagang pumalaot sa baybaying dagat ang mga mangingisda maging ang maliliit na sasakyang pandagat para masiguro ang kaligtasan at seguridad sa gitna ng epekto ng bagyo.