Nanawagan si House Prosecutor at 1-Rider Party-list Rep. Rodge Gutierrez na ipatupad ang mandatoryo at mas mahigpit na beripikasyon sa mga pasahero ng motorcycle taxi services upang maprotektahan ang mga rider laban sa mga kriminal.
Ayon kay Gutierrez, kailangang magkaroon ng mas matibay na passenger verification protocols, kabilang ang mas masusing pagberipika ng mga valid ID, paggamit ng facial recognition kung posible, at mas mahigpit na booking safeguards upang maiwasan ang mga insidenteng tulad ng pagpaslang kina Ren Ren de Laviga at Fabio Norberte Jr.
Ayon kay Gutierrez, na isa ring Senior Vice Chairperson ng House Committee on Transportation, patunay lamang aniya ito na kailangang palakasin ang mga polisiya upang matiyak ang kaligtasan ng mga motorcycle taxi rider.
Kasalukuyang nagsasagawa ang 1-Rider Party-list ng konsultasyon sa mga transport network vehicle service (TNVS) companies upang makuha ang kanilang karanasan at mga rekomendasyon na magsisilbing batayan sa pagbabalangkas ng mas matitibay na panukala at mga polisiya.
Nanawagan ang mambabatas na agarang ipasa ang House Bill No. 4416 o ang panukalang Motorcycle Taxi Act, na naglalaman ng komprehensibong mga hakbang para sa kaligtasan, regulasyon, at maprotektahan ang buhay at kabuhayan ng mga motor-riders.
Sakaling maisabatas, inaasahang magbibigay ang Motorcycle Taxi Act ng mas malinaw na regulasyon, mas matibay na proteksyon, at pagkilala sa libu-libong motorcycle taxi riders na nagsisilbing “backbone” o sandigan ng pang-araw-araw na transportasyon ng milyun-milyong Pilipino. | via Geli Mendez (Patrol 30)
