Bumaba ng 20.6% ang naitalang insidente ng walong pangunahing krimen sa bansa sa ikalawang quarter ng 2026, ayon sa Philippine National Police (PNP).
Mula sa 9,506 na naitalang kaso noong Enero 6 hanggang Abril 5, bumaba ito sa 7,883 sa sumunod na monitoring period mula Abril 6 hanggang Hulyo 4, ayon sa PNP. Bumaba ng 1,623 ang naitalang mga krimen.
Kabilang sa mga krimeng nakapagtala ng pinakamalaking pagbaba ang carnapping, r*pe, physical injury, at theft.
Iniuugnay ng PNP ang pagbaba ng krimen sa pagpapatupad ng Safer Cities Initiative ng Department of the Interior and Local Government (DILG), isang programang inilunsad noong Abril na layong palakasin ang pagpapatupad ng batas, disiplina sa komunidad, at mga hakbang ng lokal na pamahalaan laban sa krimen.
Kasabay nito, tumaas naman ng 21.74% ang bilang ng mga nahuli, naaresto, at nabigyan ng babala ng pulisya na may bilang mula 2.3 million hanggang 2.8 million.
Pinakamalaki ang naitalang pagtaas sa mga nasita at nahuli dahil sa paglabag sa ordinansa laban sa pagsusuot ng balaclava, na pumalo sa 832% sa mga lugar na may umiiral na ordinansa. Nadagdagan din ang mga nahuli sa paglabag sa noise at videoke ordinances, gayundin sa operasyon laban sa mga ilegal na istrukturang nakaharang sa mga kalsada at pampublikong lugar.
Ayon sa PNP, malinaw na may kaugnayan ang mas mahigpit na pagpapatupad ng mga batas at lokal na ordinansa sa patuloy na pagbaba ng krimen sa mga komunidad. Nanindigan din ang pulisya na ipagpapatuloy nito ang pakikipagtulungan sa mga lokal na pamahalaan upang mapanatiling ligtas at maayos ang mga pamayanan.
