Pinaigting ng Quezon City District Anti-Cybercrime Team ang barangay at school visitations bilang bahagi ng mas agresibong kampanya laban sa cyberbullying, kasunod ng insidente ng pamamaril sa isang paaralan sa Tacloban City.
Ayon kay Quezon City Councilor Aly Medalla, nakahain na ang School Safety and Child Protection Ordinance na naglalayong higit pang palakasin ang proteksyon sa mga mag-aaral at inaasahang maipapasa ngayong taon.
Aniya, nakahanda rin ang complaint system ng lungsod upang agarang tugunan ang mga reklamo kaugnay ng bullying at cyberbullying.
Sa tala ng lungsod, 33 kaso ng cyberbullying ang naitala sa Quezon City, kung saan 99 porsiyento ng mga ito ang naresolba sa tulong ng Philippine National Police at iba pang law enforcement agencies.
Samantala, pinaalalahanan ng mga awtoridad ang publiko na maging responsable sa paggamit ng social media at online gaming dahil maaari itong maging daan sa online harassment, toxic behavior, at cyberbullying kung hindi magagamit nang maayos. | mula sa panulat ni Jenn Patrolla
