Wala pang desisyon ang Senate Impeachment Court sa naging kahilingan ni National Bureau of Investigation (NBI) Director Melvin Matibag na makapagtestigo ngayong ikalawang linggo ng impeachment trial laban kay Vice President Sara Duterte.
Ito ang nilinaw ni House Prosecutor at Manila Rep. Joel Chua, na hindi pa masasabing hinarang ang kahilingan ni Matibag dahil wala pang pinal na desisyon ang senator-judges.
Sa katunayan, ayon kay Chua, pinasusumite pa sila ng written manifestation ng Impeachment Court, partikular ang request letter, invitation letter ni Matibag mula sa dadaluhang law enforcement summit sa Thailand, at ang travel authority ng opisyal.
Ito aniya ang pagbabatayan ng hukuman upang makapagdesisyon hinggil sa kahilingan ni Matibag.
Paliwanag ni Chua, masyado nang matagal kung hihintayin pang makabalik si Matibag sa Pilipinas.
Iginiit ng prosecutor ang kahalagahan ng testimonya ni Matibag bilang isa sa mga witness ng prosecution na may kaugnayan sa Article IV o bantang pagpapapatay ni VP Sara laban kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Umaasa ang House prosecution na mapagbibigyan ng Senate Impeachment Court ang kanilang hiling para kay Matibag. | via Geli Mendez/DWIZ Patrol
