Nagbabala ang House prosecution panel laban sa umano’y paglaganap ng “kultura ng pagbabanta” at iginiit na dapat magsilbing mabuting halimbawa ang mga opisyal ng pamahalaan dahil ang kanilang mga salita at kilos ay may malaking impluwensya sa kanilang mga tagasuporta at sa susunod pang henerasyon.
Sa pulong-balitaan, natanong si House prosecutor at Bicol Saro Party-list Rep. Terry Ridon kaugnay sa kaniyang natanggap na pagbabanta sa social media mula sa isang konsehal kung nagiging normal na ba ang ganitong uri ng pananalita ng ilang opisyal at kanilang mga tagasuporta.
Ayon kay Ridon, layunin ng impeachment case laban kay Vice President Sara Duterte na tugunan hindi lamang ang umano’y pagbabanta laban kay Pangulong Ferdinand Marcos Jr. kundi maging ang kultura ng pananakot na aniya’y hindi dapat maging normal sa lipunan.
Ayon kay Ridon, likas na ginagaya ng mga tagasuporta ang asal ng kanilang mga pinuno kaya dapat ding papanagutin ang lahat ng gumagawa ng pagbabanta, maging mga halal na opisyal man o mga tagasuporta.
Samantala, sinabi naman ni House prosecutor at Manila Rep. Joel Chua na mahalagang maipakita sa publiko, lalo na sa kabataan, na walang puwang ang ganitong pag-uugali sa serbisyo publiko.
Mahalaga aniya ang kasong ito upang maipakita ang pamantayang inaasahan sa mga opisyal ng pamahalaan lalo na’t sila ay tinitingala ng publiko at mga kabataan.
Binigyang-diin naman ni Deputy Speaker Janette Garin na ang kasong dinidinig sa Senate Impeachment Court ay may kinalaman sa umano’y banta ng pagpatay, na aniya’y hindi maituturing na ordinaryong pagbabanta.
Iginiit ni Garin na ang hindi pagkakasundo ay dapat lutasin sa pamamagitan ng pag-uusap at hindi ng pagbabanta.
Nanawagan si Garin sa mga opisyal ng pamahalaan na maging huwaran sa kanilang asal at pananalita.
