Bumaba ang approval at trust rating ni Pangulong Ferdinand Marcos Jr. sa ikalawang quarter ng taon.
Lumabas sa Pahayag survey ng Publicus Asia na bumaba sa 18 percent ang approval rating ng Pangulo, mula sa 19 percent noong unang quarter ng taon, habang 12 percent naman ang kanyang trust rating, mula sa dating 13 percent.
Batay sa survey, nakatulong sa pananaw ng ilang respondents ang pagtugon ng pamahalaan sa epekto ng gulo sa Middle East sa presyo ng pagkain at langis, gayundin ang pagtutol ng Pangulo sa panukalang online voting ng mga senador sa mga sesyon.
Sa kabila nito, nanatiling nagpapababa sa sentimyento ng publiko ang mga isyu sa pananagutan ng matataas na opisyal, mga panukalang pagbabago sa Konstitusyon, at pagbagal ng foreign direct investments.
Isinagawa ang nasabing survey nitong Hunyo a-bente otso hanggang a-trenta ng kasalukuyang taon sa mahigit isanlibo limang daang rehistradong botante sa buong bansa.—sa panulat ni Jordan Gutierrez
