Ayon kay House Prosecutor Atty. Benjamin Tolosa Jr., inaasahang isa sa mga isyu na tatalakayin sa Lunes ang kahilingan ng prosecution panel na buksan, imbentaryuhin, at markahan bilang ebidensiya ang naka-seal na Bureau of Internal Revenue (BIR) box na naglalaman umano ng mga dokumento at tax records nina Vice President Sara Duterte at asawa nitong si Atty. Mans Carpio.
Aniya, bahagi dapat ito ng pre-trial conference, partikular pre-marking of exhibits, at nararapat itong maisagawa bago magsimula ang paglilitis.
Sinabi rin ni Atty. Tolosa na hanggang ngayon ay hindi pa nabubuksan ang mga kahon at nananatili pa ring nakaseal ang mga ito. Dahil dito, hindi pa aniya nakita ng prosecution ang nilalaman ng mga kahon.
Ayon pa sa kaniya, una umanong tumutol ang defense team sa pagbubukas ng mga kahon at maging sa pisikal na pagmamarka sa mga ito bilang ebidensiya. Gayunman, matapos ang pre-trial conference, pumayag na umano ang depensa na buksan at markahan ang kahon, ngunit iginiit ng depensa na gawin itong closed-door executive session at hindi isapubliko ang nilalaman ng mga dokumento.
