Kumbinsido ang political analyst na si Dr. Dennis Coronacion na maaari pang madagdagan ang mga miyembro ng bagong majority bloc sa Senado.
Sa kabila ito ng pagtatapos ng Senate standoff sa pagitan ng grupo nina Senators Alan Peter Cayetano at Sherwin Gatchalian, na kalauna’y naluklok bilang bagong lider ng Mataas na Kapulungan.
Ayon kay Coronacion, posibleng mangibabaw ang pansariling interes, political calculations, at mga usaping legal ng ilang senador sa kanilang pagpapasya kung lulundag sa bagong majority.
Umaasa naman si Dr. Coronacion na matitigil na ang kaguluhan sa Mataas na Kapulungan at pagtutuunan na ng pansin ng mga senador ang kanilang mandatong paglilingkuran ang mga mamamayan. — Sa panulat ni Daniela de Guzman
