Naniniwala si dating Magdalo Party-list Rep. at dating Marines Captain Gary Alejano na may mga taong nasa likod ng pagtestigo ng ilang dating sundalo na tinaguriang “Maleta Boys” sa flood control scandal.
Ayon kay Alejano, posibleng layunin ng mga ibinunyag ng “Maleta Boys” na dating bodyguards ni dating Congressman Zaldy Co, na tibagin ang kredibilidad ng International Criminal Court sa gitna ng kinakaharap na kaso ni dating Pangulong Rodrigo Duterte at maging ng impeachment proceedings laban kay Vice President Sara Duterte.
Gayunman, nagtataka ang dating kongresista kung bakit ngayon lamang nagsasalita ang “Maleta Boys” kaya’t kwestiyonable ang kanilang hangarin.
Samantala, sa ulat naman na may inilulutong destabilization laban sa gobyerno, aminado si Alejano na hindi naman ito nawawala sa gitna ng mainit na pulitika sa bansa.
Sa kabila nito, nananatiling propesyonal at nakatuon sa kanilang tungkulin ang Armed Forces of the Philippines sa ilalim ng umiiral na chain of command at alinsunod sa Saligang Batas.—sa panulat ni Reabelle Medina
