Pinakakasuhan na ng Office of the Ombudsman sa Sandiganbayan ng plunder at paglabag sa Anti-Graft and Corrupt Practices Act si Senador Jinggoy Estrada, dating DPWH Secretary Manuel Bonoan, at ilang opisyal ng DPWH kaugnay ng umano’y maanomalyang budget insertions sa mga infrastructure project ng ahensya para sa taong 2025.
Ayon kay Assistant Ombudsman at Spokesperson Mico Clavano, umabot sa mahigit 573 milyong pisong kickback ang naipadala kay Estrada kapalit ng paglalaan ng pondo sa piling proyekto.
Kasama ring sinampahan ng kaso ang ilang district at assistant district engineers ng DPWH sa National Capital Region.
Batay sa imbestigasyon ng NBI-DOJ Public Works and Bid-Rigging Task Force, may sapat na ebidensya upang idiin ang mga pangunahing respondent sa umano’y ilegal na pagpapasok ng pondo sa budget ng DPWH.
Samantala, ibinasura naman ang kaso laban kay dating DPWH Undersecretary Maria Catalina “Cathy” Cabral dahil sa pagpanaw nito.
Inalis din sa kaso sina dating DPWH Undersecretary Roberto Bernardo, dating NCR Regional Director Gerard Opulencia, at dating Bulacan First District Engineer Henry Alcantara matapos mapasama sa Witness Protection Program ng Department of Justice.
Sa ngayon, hinihintay na ang paglalabas ng posibleng warrant of arrest laban sa mga respondent.
Humiling din ang Ombudsman ng no bail at hold departure order upang matiyak ang integridad ng kaso habang dinidinig ito sa korte.
