Ibinunyag ni Magdalo Representative Gary Alejano na ipinag utos ng administrasyong Duterte sa Armed Forces of the Philippines na itigil na ang pagpapatrolya sa West Philippine Sea.
Ayon kay Alejano, natanggap niya ang nasabing impormasyon mula sa kanyang mapagkakatiwalaang sources.
Pero aminado ang kongresista na wala siyang maipakikitang ebidensya tungkol dito.
Ayon kay Alejano, sinabi ng administrasyong Duterte sa militar na wag nang mag aksaya pa ng oras sa pagpapatrol dahil mapapagastos lang sila sa gasolina at wala naman nang mapatutunguhan ang kanilang pag iikot.
Pumalag anya ang ilang opisyal ng militar dito dahil mandato aniya nila ang magpatrolya sa teritoryo ng bansa kaya napagkasunduan na lang anyang gawing isang beses kada buwan ang pagpapatrolya sa West Philippine Sea.
AFP, itinanggi ang pahayag ni Alejano
Itinanggi ng Armed Forces of the Philippines ang pahayag ni Magdalo Partylist Rep. Gary Alejano na inutusan ng administrasyong Duterte ang militar na itigil na ang pagpapatrol sa West Philippine Sea.
Ayon kay AFP spokesman, Col. Edgard Arevalo, walang kautusan ang kanilang commander-in-chief na si pangulong rodrigo Duterte kaya’t kuryenteng balita ang ibinunyag ni Alejano.
Sa katunayan aniya ay nagpapatuloy lamang ang pagpapatrol nila sa karagatan at himpapawid ng West Philippine Sea.
Posible ring isa na naman itong paninira kay Pangulong Duterte na idinadamay pa ang militar.
Samantala, tiniyak naman ni Arevalo sa publiko na patuloy na ginagampanan ng AFP ang kanilang mandato na protektahan ang teritoryo ng bansa.
