Pormal nang napagdesisyunan ng Malaking Kapulungan ng Kongreso ang kapalaran ni Cavite 4th District Rep. Kiko Barzaga.
Kaugnay ito sa resulta ng mga ikinasang pagdinig ng House Committee on Ethics and Privileges na pinangunahan ni Chairman at 4Ps Partylist Rep. JC Abalos at iba pang committee members.
Batay sa naging desisyon ng mga mambabatas sa plenaryo ng Kamara, suspendido ng hindi lalagpas ng animnapung araw o dalawang buwan si Barzaga sa bisa ng unanimous vote ng mga mambabatas sa plenary hall.
Batay sa ginawang botohan, 249 na House members ang bumotong pabor na suspindehin si Barzaga, 5 ang nag-no o tumutol, habang 11 naman ang nag-abstain.
Kabilang sa mga tumutol ay sina KAMANGGAGA Partylist Rep. Eli San Fernando; SAGIP Partylist Rep. Henri Marculeta; Bagong Henerasyon Partylist Rep. Robert Nazal; at Batangas Rep. Leandro Legarda Leviste.
Sa privilege speech ni Chairman Abalos, binanggit niya na 29 complainants ang naghain o nagreklamo laban sa bagitong mambabatas dahil na rin sa patuloy na paglabag at hindi magandang pag-uugali ni Barzaga sa plenaryo ng Kamara.
Maging ang mga ipinopost nito sa kaniyang social media accounts na umaatake sa mga government institutions at mga opisyal ng gobyerno.
Ang desisyon ay ginawa, kasunod na rin ng inihain reklamo ng political party leaders sa pangunguna ng National Unity Party o NUP Chairman at House Deputy Speaker Ronaldo “Ronnie” Puno.
Kabilang sa naging basehan ng reklamo kay Barzaga ang Article 142 ng Revised Penal Code; Section 141 Rule 20 ng House of Representatives; at ang Republic Act 6713 o ang Code of Conduct and Ethical Standards for Public Officials and Employees.
Binanggit din ni Abalos na nilabag ni Barzaga ang RA 6713 at ang Rule 20 ng House dahil sa “conduct unbecoming of a public official” o maling pag-uugali.
Hindi naman isinama ang inciting to sedition case ni Barzaga dahil administrative lamang ang tungkulin ng ethics panel.
Dahil dito, dalawang buwang hindi makatatanggap ng salary o sahod si Barzaga bilang mambabatas.
Ipinunto ni Abalos na bilang isang public official ay sinasalamin at kinakatawan ng bawat kilos ang buong institusyon.
