Nagtataka si Senadora Grace Poe kung bakit wala sa mga inirekomendang kasuhan ng Ombudsman si Transportation Secretary Joseph Emilio Abaya.
May kaugnayan ito sa maanomalyang maintenance contract na pinasok ng Metro Rail Transit o MRT 3 kung saan, pinakakasuhan si dating General Manager Al Vitangcol at 5 iba pa.
Ayon kay Poe na siyang Chairman ng Senate Committee on Public Services, muli niyang pag-aaralan ang naging resolusyon ng Ombudsman upang tukuyin kung bakit tila inabsuwelto sa kaso si Abaya gayung lumagda ito sa nasabing kontrata.
Magugunitang iginiit ng Ombudsman ang paggamit ni Vitangcol sa kaniyang posisyon para ipagkaloob ang maintenance contract sa kumpaniyang PH Trams-CB & T Joint Ventures na kontektado sa kaniyang uncle in law.
Gayunman, iginagalang ni Poe ang resulta ng imbestigasyon ng Ombudsman at sinabi nitong magsilbing babala sa kasalukuyang administrasyon ng MRT ang sinapit ni Vitangcol at iba pa.
By Jaymark Dagala
