Naniniwala si presidential aspirant Ferdinand “Bongbong” Marcos, Jr., na makakaahon na mula sa COVID-19 pandemic ang mga nasa sektor ng turismo ngayong nagsisimula nang tumanggap ng mga bakunadong turista ang iba’t ibang mga lugar sa bansa.
Ayon kay Marcos, halos lahat ng sektor sa bansa ay naapektuhan ng krisis na dulot ng pandemya.
Ang pagluluwag aniya sa travel restrictions ay magreresulta sa mas maraming trabaho at dahil dito ay unti unti na ring sisigla ang ekomiya ng bansa.
Ngayon aniyang niluwagan na ang restrictions sa pagpunta sa mga tourist spots ay inaasahan ang pagtaas ng bilang ng mga turista gayong pinayagan na rin ng gobyerno na taasan ang daily cap sa mga pasaherong dumarating mula 1,500 hanggang 2,000.
Naniniwala si Marcos na magdudulot ng long-term benefits sa bansa kung mas mataas ang public spending at strategic investments para sa pagpapaunlad ng turismo.
Sa mas ligtas at mas magandang sektor ng turismo sa bansa, mas madami aniya ang trabaho at tataas din ang kita ng lokal na pamahalaan.
Kabilang sa mga nagawa ni Marcos noong siya ay gobernador ng Ilocos Norte ay gawing major tourist destination ang lalawigan.
Samantala, patuloy namang hinihikayat ng dating senador ang publiko na magpabakuna na laban sa COVID-19.
Pinaalalahanan rin ni Marcos ang mga lokal na pamahalaan na tiyaking ligtas at nasusunod ang health protocols kontra COVID-19.