Gumulong na ang imbestigasyon ng Department of Education (DepEd) sa insidente ng paglabag sa health standards na nangyari sa Daet, Camarines Norte nitong ika-11 ng Hunyo.
Kasunod na rin ito nang kumalat na video ng umano’y graduation sa Barangay Dogongan kung saan makikitang iisang face mask lamang ang pinagsasalit-salit na ipinagamit sa mga estudyante.
Inatasan ng fact finding team ng Division Investigation Committee na binuo ng DepEd Region 5 ang sangkot na indibidwal na magsumite ng paliwanag habang ang DepEd COVID-19 Task Force naman ang pinagbabantay sa kondisyon ng mga mag-aaral na naroon sa naturang aktibidad.
Nakipag-ugnayan na ang DepEd sa barangay health response and emergency team, gayundin sa local government unit para makapagsagawa ng precautionary measures.
Iginiit ng DepEd na suspendido pa rin ang pagdaraos ng face-to-face graduation at moving up rites.
