Naka-heightened alert na ang Philipine Coast Guard (PCG) sa mga pantalan ngayong holiday season.
Ang hakbang, ayon kay PCG Commandant Admiral Joel Garcia, ay bahagi ng ‘Oplan Biyaheng Ayos Pasko 2019’ simula ngayong araw na ito, December 16 hanggang January 5, 2020.
Kasunod na rin ito ng direktiba ni Transportation Secretary Arthur Tugade na tiyaking magiging ligtas at komportable ang lahat ng transportation services para sa publiko.
Ipinakalat na rin ang assets ng PCG sa mga pangunahing pantalan tulad ng 55-meter multi mission offshore vessels, siyam na 44-meter multi role response vessel, anim na 30-meter monitoring control surveillance vessel, dalawang 35-meter search and rescue vessels at tatlong 24-meter fast patrol boats.
Nakahanda rin ang maliliit na sasakyang pandagat tulad ng dalawang 12-meter high speed boat, 10 7-meter rigid hull inflatable boats at ilang aluminum at rubber boats para rumesponde sakaling magkaroon ng hindi inaasahang insidente.
24/7 na ring nakaalerto ang special operations forces, harbor patrols at ship inspectors sa mga pantalan.
