Nagpapatuloy pa rin ang ginagawang imbestigasyon ng mga awtoridad hinggil sa reklamo ng 16-year-old na grade 11 student laban sa barangay chairman at head coach ng isang football team sa Tanauan City, Batangas.
Batay sa ulat ng Police Regional Office 4-A, dumulog ang biktimang itinago sa alyas na dane kasama ang kaniyang ina sa Tanauan City Municipal Police Office para isumbong ang paulit-ulit na panghahalay sa kaniya ng suspek na kinilalang si Ramil Mercado ng Barangay Altura Bata.
Nakasaad sa sinumpaang salaysay ng biktima, ilang beses na umano siyang pinagsamantalahan ng suspek na si Mercado na kaniya ring coach sa football mula 2017 hanggang 2018 kung saan, nangyayari umano ang panghahalay tuwing may laban o laro sila sa loob at labas ng bansa.
Natakot nuon ang biktima na magsumbong dahil sa pinagbabantaan siyang sisibakin sa football team at babawian ng scholarship sakaling tumanggi itong makipagtalik sa suspek na barangay chairman.
