Nakahanda na ang National Grid Corporation of the Philippines o NGCP sa posibleng epekto ng bagyong Agaton sa kanilang pagbibigay ng suplay ng kuryente at mga transmission facilities.
Ayon sa NGCP, inihanda na nila ang kanilang mga communication equipment, hardware materials at iba pang suplay para matiyak ang agad na pagbabalik ng kanilang operasyon sakaling kailanganin ang pagsasaayos ng kanilang mga pasilidad na maapektuhan ng bagyo.
Nakaantabay na ang kanilang mga ipinadalang mga tauhan sa mga lugar na posibleng kailanganin ang agarang pagbabalik ng suplay ng kuryente.
Dagdag ng NGCP, ang paghahanda ay bahagi ng kanilang integrated disaster action plan at iba pang patakaran para matiyak ang kahandaan ng lahat ng kanilang mga pasilidad na inaasahang maaapektuhan ng pagtama ng bagyo.
Una nang inihayag ng PAGASA ngayong Martes ng umaga na tuluyan nang nag-landfall ang bagyong Agaton sa bahagi ng Dinagat Island at Siargao Island.
